CEBU, Philippines — Patay ang usa ka 37-anyos nga giingong hubog nga lalake human kini pusila sa wala mailhing kriminal diha sulod sa diskohan niadtong Domingo sa kadlawon diha sa Barangay Esperanza, lungsod sa Aloguinsan.
Ang biktima giila sa kapolisan sa lungsod nga si Allan Ragodos, residente sa maong dapit ug usa ka mangulingay.
Si PO3 Recelieto Kilaton sa Aloguinsan Police Station nagkanayon nga nag-inom og ilimnong makahubog ang biktima uban sa iyang maguwang ug mga silingan sulod diha sa diskohan.
Giingong niadtong higayona dunay gipahigayong disko diha sa lugar isip usa sa mga kalingawan sa kasaulogan sa ilang pista.Giingong pagkakadlawon niadtong adlaw’ng Domingo dihang nahubog na ang biktima nakakita kini og away sa wala mailhing lalake.
Usa ka buto sa armas na lang ang nadunggan sa mga tawo diha sa diskohan ug giingong namatay diha-diha dayon ang biktima kinsa nakaangkon og samad pinusilan sa walang dughan ug ang bala milapos ngadto sa iyang buko-buko.
Nakuha sa mga polis gikan sa lugar nga nahitaboan ang usa ka kabhang sa bala sa kalibre .45. (BANAT NEWS)