Duha patay sa pagpamusil

CEBU, Philippines — Duha ang patay samtang usa ang grabeng naangol sa nahitabong buwag nga mga pagpamusil diha sa dakbayan sa Lapu-Lapu niadtong Sabado sa gabii.

Ang unang pagpamusil nga nahitabo alas  8 pasado sa gabii sa Sitio Bunga, Barangay Agus diin usa ka Edgardo Alcasare Siaboc, 33, drayber og traysikol nga taga Sitio Bukid-Bukid, Barangay Pajac ang biktima.

Si Police Officer 3  Wilson Malnegro sa Homicide Section sa Lapu-Lapu City Police Office (LLCPO) miingon nga usa ka babaye nga pasahero sa biktima nga si Doly Arong mitug-an nga miangkas sa luyong lingkoranan ang mamumuno.

Matud pa niini, nagdagan ang traysikol paingon sa usa ka mall  dihang kalit na lang niyang nadunggan ang sagunson nga buto sa armas.

Nakahigayon pa sa pag-ambak sa gimaneho niyang traysikol ang biktima apan gisundan kini sa mamumuno ug giusban pagpusil dayon gitiwasan hinungdan sa hinanali niining kamatayon.

Nakaplagan sa crime scene ang duha ka basiyo sa mga bala sa kalibre .45  nga gituohang gikan sa armas sa mamumuno.

Paglabay sa dul-an usa ka oras, laing pagpamusil ang nahitabo alas 9 pasado ang takna sa Sitio  Datag,  Barangay  Maribago  diin ang biktima gipasanginlang nalambigit sa ilegal nga drugas apan mitahan na kaniadto sa kapolisan.

Giila ni Malnegro ang biktima nga  mao si Niel  Amodia Tumulak, 33, samtang napagan ug grabeng naangol  ang usa ka Alma Patigdos Sagarino, 49, kinsa naatol diha duol sa biktima atol sa pagpamusil.

Matud pa ni Malnegro nga naglingkod sa gi-parking niyang motorsiklo ang biktima dihang kalit gihunongan og laing motorsiklo nga giluwanan sa duha ka wala mailhing lalaki ug ang back rider nga nagtabon og panapton sa iyang nawong mipusil sa biktima.

Misuway og dagan palayo ang biktima apan gigukod ug wala lung-i sa pagpusil ug dihang natumba gitiwasan kini sa pagpusil.

Samtang ang babaye nga si Patigdos nga naatol usab nga nahiagi sa maong dapit naigo og saag nga bala diha sa iyang likod ug nadala sa tambalanan.

Sa crime scene maoy napalgan ang deformed slug sa duha ka mga bala sa kalibre .45. Ang mga imbestigador sa kapolisan sa maong dakbayan wala pay lead kon unsay mga motibo ug kon kinsa ang mga responsable sa maong mga duha ka mga pagpatay. (BANAT NEWS)