Ikaduhang kinabuhi

CEBU, Philippines — Ang grasya ni Sr. Sto. Niño nasinati sa tagsa-tagsa kanato sa bisan unsa nga pamaagi. Managlahi man og pagpakita sa milagro, apan ang diwa kay magkaparehas ra, ang pag-angkon ug kahupayan sa sakit ug pagkabaton og grasya gikan kaniya.

Usa sa nakadawat sa dakong grasya ni Sto. Niño mao si Rey Rabbi Galarion, 35, minyo ug nagpuyo sa Nivel Hills, Busay, Cebu City.

Dakog papel matod pa si Sto. Niño dili lang sa iyahang kinabuhi kun dili lakip na sa tibuok niya nga banay.

Unang milagro nga nadawat ni Rabbi mao ang pagkabata pa niya sa dihang nasunog ang balay nila apan wala kini nalukop og sunog kay matod pa gitabangan sila ni Sto. Niño.

Gipaambit niya nga ganahan kaayo sila mokuyog sa iyahang igsoon ngadto sa ilahang ginikanan nga moadto sa kapilya aron moapil sa nobena sa Sr. Sto. Niño apan wala sila pakuyoga niini kay daw magduwa lang sila didto.

Kay wala man sila gipakuyog, nagdagkot nalang sila og kandila sa ilahang balay ug kunuhay nag-ampo sa Balaang Bata. Apan nakatulog sila nga wala napalong ang kandila. Hinungdan nga nasunog ang ilahang altar ug bongbong tungod niini.

“Nakatog man me, nidukot diay sa bongbong ang kandila unya nasunog siya. Maayo nalang nahunong ang sunog didto gyud sapit sa kalendaryo nga karton nga naay imahe ni Sto. Niño,” niya pa.

Pag-abot sa ilahang mga ginikanan kay wala na lang sila nakasab-an kay nangangha kini nga napalong ang kayo didto gyud dapit sa imahe ni Senyor.

Ug ang ikaduhang milagro nga nadawat ni Rabbi mao ang pagkabuhi niya og human siya nakuryentehan sa dihang nag-edad siya og 10s anyos.

Presidente ang iyahang amahan sa kapilya sa Sto. Niño didto sa Nivelhills, Lahug. Misubay si Rabbi nga gipasaka siya sa iyahang amahan ngadto sa atop sa ilahang kapilya kay gipatabang kini nga magmontar og mga wire sa pagtaud nila og trumpa sa kapilya.

Samtang naghuwat siya sa iyahang amahan nga moitsa sa kuryente, naglingkod siya sa atop ug nag-akin-akin ug gipabitay iyahang tiil duol sa puthaw nga basketball ring nga adunay suga ug kuryente nga adunay panit.

“Nabag-id akong tiil sa puthaw nga naay kuryente, ug didto nikuryente siya,” paambit niya. Nikirig si Rabbi ibabaw sa atop ug nilatay ang kuryente sa iyahang kalawasan. Aduna matud pa’y nakakita kaniya apan wala lang siya panumbalinga kay nagtuo nga nagduwa lang.

“Mga five  minutes gyud ko ato nikirig tibuok lawas,murag mo give up nako, luya na kaayo ko ug hangtod nga nadapat na gyud akong ulo sa atop unya namatay ko,” matud pa niya. Pagtawag na sa iyahang amahan kaniya kay wala na siya nitingog ug tiil na lang niya ang nakita. Nisaka iyahang amahan sa atop ug didto na nasuta nga wala na siya’y pulso ug wala na nipitik ang iyahang kasing-kasing.

Bisan nga wala na siya’y pulso gidala siya sa iyahang amahan sa ospital. Sigon pa ni Rabbi, nakita niya ang kaugalingon nga gidala padulong sa ospital.

“Nahibulong ko nga nakakita ko sa akong kaugalingon nga gisakay sa sakyanan padulong sa ospital, murag kalag nako ba,” dugang pa niya.

   Sa sakyanan, nag-ampo iyahang amahan ngadto sa Sto. Niño,niingon kini nga kung buhion gyud si Rabbi sa Ginoo isipon niya kining usa ka dakong milagro, kung kuhaon na gyud  ang anak niini kay dawaton niya kini.

“Sa wala pa me naabot sa ospital kay niagulo ko, nahibong akong papa, ug nihilak siya kay gidungog ni Sto. Niño ang iyahang pag-ampo,”sigon pa niya.

Pag-abot sa ospital kay dali kining gitabang ug hangtod nga nakamatngon siya. Gipahigayonan siya og mga laboratory ug nigawas ra sab dayon sila sa ospital ug niuli sa ilaha.

“Pag-abot nako sa amoa kay nidiretso sa kapilya ug nilingkod dayon ko sa atubangan ni Sto. Niño ug nakig-estorya kaniya,” matud pa ni Rabbi.

Sukad adto, kanunay na gyud siya motabang sa iyahang amahan sa pag-atiman sa kapilya sa ilahang lugar. Hangtod nga namatay ang iyahang amahan ug siya na ang nipuli niini.

Giisip niya nga milagro gyud kadto ni Sto. Niño ang pagkabuhi niya kay ilahang tibuok pamilya kay grabe gyud kadeboto sa Balaang Bata.

“Mosaad ko ni Sto. Niño nga moserbisyo gyud ko niya, kanang serbisyo nga dili mangayo og bayad, ug  kinasing-kasing nga pagpanerbisyo. Ako ning gibuhat isip pasalamat sa iyahang paghatag og ikaduhang kinabuhi nako,”panapos pa niya.

Ang ikaduhang deboto nga nakadawat og dakong milagro gikan sa Balaang Bata kay ang manag-asawang Jojie dela Cerna, 45, ug Nestor dela Cerna, 50 anyos ug ang anak nila nga si Ace Ernest Dela Cerna, 8 anyos na karon.

Gikan dinhi sa Sugbu, nibiyahe ang manag-asawa didto sa Cagayan de Oro tungod sa trabaho ni misis didto isip miyembro sa banda. Duha na ang ilahang anak niining panahona.

Nagsabak si Jojie sa ikatulong anak niini didto sa Cagayan. Nagsabak pa lang siya kay gipasidan-an na siya sa iyahang doktor nga dili normal ang development sa iyahang bata.

Tuod man, gi-cesarian gyud siya sa dihang nanganak siya. Pagkamatngon na niini, wala niya nahinabi ang iyahang bata kay gidala kini sa usa ka pribadong ospital aron masulod kini sa Intensive Care Unit kay nasuta nga adunay cyst ang baga niini.

Duha ka semana nga coma ang iyahang anak ug giprangkahan na sila sa doktor nga dili na kini magdugay.

Niining panahona, wala’y laing gibuhat ang inahan nga si Jojie kun dili mag-ampo ngadto sa Balaang Bata.

“Magsige ko og simba ug mag-ampo sa balay atubangan sa akong Sto. Niño gikan dinhi sa Sugbo,” suma pa niya.

Gipabunyagan sab nila sulod sa ospital ang masuso nga si Ace aron kung mamatay kini aduna kini pangalan dad-on didto sa langit.

Sa dihang nag-ampo siya sa ilahang balay, kalit nga nitawag ang nurse kaniya nga paadtoon dayon sa ospital kay nimata na ang bata gikan sa duha ka semana nga na-coma. Tungod kay sa pribado man nga ospital na-admit iyahang anak,dako kaayo sila og nabayran ug nabaligya gyud nila ang ilahang balay ug yuta didto sa squatters area nga gipuy-an.

Giingnan sila sa doctor nga kinahanglan nga operahan ang bata sa baga ug tagtangon ang cyst niini. Apan dili kini mabuhat didto sa ilahang ospital kay wala’y espesyalista nga doktor didto ug kuwang sila sa ekipo.

Maong gitambagan sila nga mouli nalang dinhi sa Sugbo kay daghan ang ospital nga kompleto og gamit dinhi.

Pag-abot gyud nila dinhi sa Sugbo, nideretso sila sa Basilica ug nangayo og tabang sa Balaang Bata. “Ako siyang gikugos unya nagluhod ko gikan sa pultahan sa Basilica hangtod sa altar. Nag-ampo ko nga unta tabangan ko niya sa pagpatambal sa akong anak,” saysay pa niya. Paspas nilihok ang milagro niadtong panahona kay paggawas gyud nila sa Basilica kay adunay nakakita sa iyahang bata ug nangutana kung naunsa kini. Nisubay si Jojie sa kahimtang sa bata ug dali siyang gitabangan sa usa ka babaye didto ug gidala sila sa Vicente Sotto Memorial Medical Center.

Gi-admit sa Sotto ang  iyahang anak ug pipila ka semana ang nilabay kay naoperahan gyud kini. Dako siyang pasalamat sa Ginoo nga nagmalamposon gyud ang operasyon sa bata kay sa wala pa kini operahi kay giprangkahan na sila sa doktor nga dili sila sigurado nga makasugakod ang bata samtang operahan.

“Sige nakog hilak kay niana ang doctor nga tulo iyahang gikoptan nga kaso parehas sa akong anak, ang usa namatay, ang usa wala na nitunga ug last ang akong anak,”paambit pa niini. Gibutyag ni Jojie nga wala siya’y laing gibuhat kun dili mag-ampo didto sa Basilica ug nagpasalamat siya sa Balaang Bata nga gidungog gyud ang iyahang pag-ampo.

Sa pagka- karon, otso anyos na ang anak nila nga si Ace ug wala na kini nagmulo sa sakit niini sa baga.

“Normal ra ang kondisyon sa akong anak karon, dakong milagro gyud to ni Sto. Niño. Gidayeg nako ang Balaang Bata gyud. VIVA PIT SENYOR!,panapos pa niya.