Espino girelibohan

CEBU, Philippines — Giparelibohan si Police Regional Office-7 Regional Director Chief Supt. Jose Mario Espino paingon didto sa Police Regional Office-10 sugod kagahapong adlawa human miluwat ang reassignment order ang kampo Crame kagahapong adlawa.

Adto siya ibalhin sa PRO-10 sa Misamis Oriental samtang ang mopuli kaniya si Police Chief Supt. Robert Quenery gikan sa Police Regional Office-2 didto sa Tuguegarao City, Cagayan. Positibo kining gidawat sa maong heneral sanglit matud pa nga mas dako ang responsibilidad ang gitugyan sa kadagkoan kaniya.

"I consider it as gift. Siguro nakita nila na we are better officer to handle more challenging job. PRO-10 is included in the areas under Martial Law," si Espino miingon.

Kahinumduman nga nagkontrobersiya ang pangalan ni Espino human may migawas nga “white paper” nga may mga seryosong alegasyon nga gibato kaniya ug sa iyang kapikas. Apil na niini ang pasangil nga nagdawatan kini og payola gikan sa gambling lords dinhi sa Sugbo, butang nga kusganon niyang gihimakak ug gihulagway niyang daghan ang gustong dauton ang iyang pagkatawo. Giklaro hinuon ni Espino nga walay kalabutan ang maong kontrobersiya sa pagbalhin kaniya.

"That has no issue sa assignment. I already gave my comment that is definitely not true. Ito po ay normal sa mga commanders being allegedly tag nag involved sa illegal gambling," si Espino miingon.

Sa unom ka buwang pagpanerbisyo sa maong opisyal sa Central Visayas, matud pa niya milampos siya nga pagpaubos  sa crime volume dinhi.

Gusto ni Espino mahinumduman sa mga Sugboanon nga maoy nangulo sa preparasyon sa seguridad alang sa Sinulog 2018. Matud pa nga karon pang Lunes ang ilang nasabotang ceremonial turnover kang Quenery aron nga makita pa niya ang resulta sa ilang gimugnang plano sa seguridad sa Sinulog 2018.

"Kung di ako payagan mag-leave ako ng three days as RD of PRO-10 to finish the Novena Mass," dugang ni Espino.  Sa pikas bahin, nasurprisa si Cebu City Mayor Tomas Osmeña sa pagrelibo kang Espino kinsa nauyonan niya ang pamaagi sa pagdala sa kapolisan.

“Wow, I’m surprised. I get along very well with Espino now we have a new one. What happened?” sigon ni Osmeña.

Si Osmeña miingon wala siya makadungog gikan sa iyahang mga contacts niining mga gipasangil batok sa heneral ug gani matud niya maayo ang performance niini.  Nagtuo hinoon si Osmeña nga dili maapektuhan ang pangandam nga gihimo sa Sinulog 2018 tungod niini.

Apan nanghinaot ang mayor nga kon unsay nasugdan nga mga pagpangandam ipadayon kini sa bag-ong molingkod nga director nga si Chief Superintendent Robert Guzman Quenery.

“I have no reason to believe it would because its organize down to the last person unless the new person will start to shuffle things around then there might be a problem,” ni Osmeña pa. Samtang subling giklaro sa mayor nga ang liquor ban ipatuman 300-meter radius gikan sa Sinulog route ug kadtong mga dapit nga layo ra sa 300-meter radius dili maigo sa liquor ban. (IBM) (BANAT)