CEBU, Philippines — Nadakpan sa nagpatrolya nga sakop sa kapolisan sa Presinto 1 sa Mandaue City Police Office (MCPO) ang usa ka tawo nga naghupot og shabu sa Mantawi Drive, Barangay Guizo sa maong dakbayan alas 5 pasado sa hapon niadtong niaging adlaw.
Si Police Officer 3 David Omambac sa Presinto 1 sa MCPO niila sa nadakpan nga si Jade Cabang Ybañez, 23, taga Sitio Ihawan, Barangay Mantuyong sa maong dakbayan.
Ang nagpatrolya nga team gipangulohan ni Police Officer 2 Rogien Sequeño diin sa ilang paglabay sa Mantawi Drive maoy ilang namatikdan ang suspek nga katahapan ang lihok.
Ilang gisita ug girekisa ang kalawasan ug nadiskubrehan ang gidala niini nga duha ka gagmay nga pakete sa shabu hinungdan nga ilang gidakop ug gibalhug sa detention cell.
Samtang ang mga sakop sa City Intelligence Branch sa Lapu-Lapu City Police Office (LLCPO) nga nagpahigayon og buy-bust operation sa Sitio Litob, Kalawisan ang nakasakmit og 56 ka gagmay nga pakete sa shabu nga kantidad og P19,824 ug nasikop ang upat ka gikatahapang pushers.
Si Police Officer 2 Joel Caretan sa CIB sa LLCPO niila sa mga nadakpan nga sila si Shena Amoin, 24; Raymond Baron delos Santos, 28; Edelberto Tampus, 38, ug John Eric Inihao dela Torre, 20, pulos nagpuyo sa maong dakbayan.
Dugang ebidensiya nga nasakmit gikan sa mga dinakpan ang P750 nga gituohang halin ug P300 nga marked money nga gigamit sa poseur buyer sa pagpalit og shabu. (BANAT NEWS)