Apura nangayo og pasaylo sa trapik
Daghan sa mga motorista ang nagyawyaw sa ilang Facebook account ug gani ang uban nga padulong sa Siyudad sa Sugbo ang nibalik na lang sa agi tungod kay tulo na sila ka oras nga wala gyud nakairog. File
CEBU, Philippines — Nangayo og pasaylo sa mga motorista si Carcar City Mayor Nicepuro Apura human natanggong sa grabeng trapik niadtong Sabado sa gabii.
Daghan sa mga motorista ang nagyawyaw sa ilang Facebook account ug gani ang uban nga padulong sa Siyudad sa Sugbo ang nibalik na lang sa agi tungod kay tulo na sila ka oras nga wala gyud nakairog.
Ang mga pasahero sab sa Cebu South Bus Terminal ang taud-taud nga naghuwat sa mga bus kay dugay kini nakabalik.
Asoy pa ni Apura nga natingala siya sa balita tungod kay wala man siya sa ilang siyudad niadtong higayuna.
Nasuta nga usa lang ka lane sa Katugasan ang naagian gumikan sa pag-ayo sa karsada ug puli-puli lang ang mga sakyanan sa pag-agi.
Si Apura nagkanayon nga kung nakig-alayon pa niya ang kontraktor sa proyekto sa Department of Public Works and Highways, hayan dili unta mahitabo ang sitwasyon.
Matud ni Apura nga wala siya katarung og tulog sa maong panghitabo hinungdan nga sayo kagahapon sa buntag iya gibisita ang lugar.
Maayo na nga naagian ang maong karsada alas 10 sa buntag. (BANAT NEWS)
- Latest
