Duterte: Mga gawi ni Rizal angay sundon sa uban
CEBU, Philippines — Gipangulohan ni Presidente Rodrigo Duterte uban ni Bise Presidente Leni Robredo kagahapong adlawa ang pagtimaan sa ika-121 nga anibersaryo sa pagkamartir sa Nasudnong Bayani nga si Dr. Jose P. Rizal.
Si Duterte nanawagan sa katawhang Pilipino nga sundon ang mga maayong gawi ug giisip nga oportunidad karon aron ilhon ang kabayanihon ni Rizal
“Let us reflect on his patriotism as we strive to continue his work of building a more united, peaceful and prosperous Philippines,” sumala pa sa mensahe ni Duterte.
Si Duterte maoy nangulo sa flag-raising ug wreath-laying ceremonies diha sa Rizal Monument sa Rizal Park sa Manila diin apil sa mga mitambong mao ang mga kabanay ni Rizal.
Dinhi sa Sugbo, usa ka mubo nga reenactment sa pagpatay kang Rizal ang gihimo diha sa Plaza Sugbo kagahapon nga gipangulohan ni acting mayor Edgardo Labella gitambongan usab sa mga konsehal, magtutudlo ug uban pa.
Ang Order of the Knights of Rizal- Cebu City Chapter mi-request sa Cebu City Government nga usbon ang pangalan sa City Hall Lane atubangan sa City Hall nga Dr. Jose Rizal Street.
Samtang sa Lapu-Lapu City, gipangulohan ni Mayor Paz Radaza ang kalihokan uban sa mga sakop sa konseho, mga kawani sa kagamhanan ug mga opisyal sa kabarangayan.
Si Rizal nga nahimugso niadtong Hunyo 19, 1861 ug gipatay sa mga Katsila niadtong Disyembre 30, 1898 tungod sa iyang mga sinuwat batok sa mga Katsila nga nahimong inspirasyon sa Katipunan ug sa rebolusyon. (BANAT NEWS)
- Latest
