CEBU, Philippines — Hugot karon nga gibantayan sa kagamhanan sa Siyudad sa Sugbo ang pagpamaligya og pabuto sa mga gagmay’ng tindahan nga gidili sa balaud.
Giawhag ni Konsehal Dave Tumulak, deputy mayor for police matter, ang tanang barangay tanod nga makig-alayon sa kapolisan sa ilang tagsa-tagsa ka barangay sa pagkompiskar sa mga firecrackers nga ipamaligya sa mga sari-sari stores.
Si Tumulak nakabantay nga daghang sari-sari stores nga namaligya og mga pabuto sa mga bata.
Sa Siyudad sa Sugbo, ang South Road Properties lang ang lugar nga gitugutan nga diha makabaligya og mga pabuto.
Giingong sagad sa mga sari-sari stores nga namaligya og pabuto duol sa mga pangpublikong tunghaan.
“Ang ato lang tumong ani is ma-out of danger ang atong mga bata ug dili sad matugaw pud ang atong mga katawhan bisan kuno sa lawom na kaayo nga gabii naay magpabuto makuyawan sila, makamata,” sigun ni Tumulak.
Ang masakpang mamaligya gawas sa SRP pahamtangan og silot sa kalapasan sa City Ordinance 2290 ug Republic Act 7183 nga nag-regulate sa pagbaligya, manufacture, distribution ug paggamit og pabuto ug ubang pyrotechnic devices.
Kun dunay makompiskar ang mga barangay tanod nga mga pabuto itugyan kini sa Bureau of Fire Protection alang sa proper disposal.
Samtang ang pagpamaligya og firecrackers ug pyrotechnics sa SRP magsugod duha ka semana gikan karon. (BANAT NEWS)