Transport protests gipangandaman

CEBU, Philippines — Gipangandaman sa kagamhanan sa siyudad sa Sugbo ug sa Mandaue ang gikatakdang lihok protesta sa mga sakop sa Pagkakaisa ng Samahan ng mga Tsuper at Operators Nationwide (PISTON) karong adlawa nga magsugod gikan sa Fuente Osmeña Circle paingon sa Cebu City Hall.

Matud ni Greg Perez, coordinator sa PISTON-Cebu ang pagpahigayon nila og lihok-protesta aron ipaabot ang ilang panawagan  mahitungod niining planong pag-phase out niining mga karaan na kaayo nga mga jeep de pasaheroan ug pagpadayag usab sa pagsupak nila sa Bus Rapid Transit.

Sigon ni Perez, supak sila sa implimentasyon sa BRT sanglit daghan mga Public Utility Jeepneys ang mawagtang ug maapektuhan hinungdan nga moadto sila sa city hall aron ipadangat kini ug nanghinaot sila nga dunay opisyal sa siyudad ang moatubang kanila.

Si Cebu City Mayor Tomas sa iyang bahin miingon angay madungog ang tingog sa mga nahisgotan ug kini miasoy nga mipahigayon sila og konsultasyon kalabot sa BRT project sukad pa niadtong tuig 2008.

Nunot niini, si Konsehal Dave Tumulak, Chairman sa Committee on Public Order and Safety miingon bisan og ang gisulti sa grupong PISTON nga rally lang ug walay strike nangandam lang gihapon sila niini.

Matud ni Tumulak, dunay ipa-stand by nga Kaohsiung ug Ceres Bus nga ipahimutang sa South Road Properties ug motawag lang ang mga tawo sa Command Control Center kun dunay matanggong nga mga pasahero.

Inig abot sa PISTON sa City Hall si Tumulak maoy moatubang kanila aron  paminawon ilang mga yangungo.

Samtang ang Operations Head sa Cebu City Transportation Office (CCTO) Francisco Ouano nagkanayon dunay ipakatap nga mga traffic enforcers sa mga dapit nga agian sa lihok protesta  nga himoon sa PISTON.

Sa laing bahin, ang Mandaue City naghimo usab og susamang pangandam aron walay maaberyang mga sumasakay. Nangangkon ang PISTON nga 200 nila ka mga sakop ang mosalmot sa maong kalihokan. - /IBM) (BANAT NEWS)