CEBU, Philippines — Si Cebu City Mayor Tomas Osmeña mipasalig sa publiko nga aduna na unya’y improvement sa pagkolekta sa mga basura sa siyudad.
Kini human nga ang Pasajero Motors Corporation nagsugod na sa pag-operate sa 21 ka equipments sulod sa 24 oras matag-adlaw. Ang Pamocor nagsugod sa ilang operasyon niadtong milabay’ng Martes.
Matud sa mayor nga ang improvement sa pagkolekta sa basura mabatyagan unya kini sa mga mosunod nga duha o tulo ka semana.
Subay niini, gitubag ni Osmeña ang mga reklamo sa kampo sa Barug Team Rama nga giingong mahal ang abang sa heavy equipments.
"Mas mahal if you don't collect the garbage, mas mahal kong imong gipalit ang basura”, matud ni Osmeña.
Niadtong milabay’ng Oktubre 2, ang Pamocor maoy midaog sa gihimong public bidding alang sa rental contract.
Ang hepe sa Department of Public Services, Roberto Cabarrubias nagkanayon nga mapadali na ang pagkolekta sa mga basura tungod sa mga dugang nga equipment.
Si Konsehal Eugenio Gabuya, Jr., council chairman of public services mibutyag sa The Freeman (igsuong publication sa Banat News) nga ang mga dump truck i-assign kini sa pagkolekta sa mga basura diha sa mga establisamento ug kabarangayan.
Nunot niini, si kanhi city council chairman on the committee of environment, Konsehal Joel Garganera nagkanayon usab nga mahal ang abang sa mga equipment.
Matud ni Garganera nga ang siyudad sulod sa usa ka adlaw magbayad og P16,800 sa matag unit nga halos gubaon na ug magbayad usab sa gasolina ug loaders o sa mosunod nga tulo ka buwan ang siyudad magbayad og P1,512,000 matag unit. (Gikan sa The Freeman/BDB)