CEBU, Philippines — Niabot sa kapin 600 ka punoan sa marijuana ang gipang-ibot sa mga sakop sa kapolisan sa Siyudad sa Toledo sa may Sitio Caluktugan, Pangamihan, bukirang barangay sa dakbayan.
Matud sa kapolisan nga aduna sila’y nadawat nga sumbong nga adunay nakita nga mga punoan sa marijuana sa maong lugar hinungdan nga dali kining girespondehan sa mga awtoridad.
Wala na naabti sa kapolisan ang usa ka Eduardo Cabiles kinsa gituohang maoy nagdumala sa gitamnan sa mga punoan sa marijuana.
Nasikop atol sa maong operasyon ang usa ka grade 11 nga tinun-an nga si Rejunior Pardillo Laspoña, 23, kinsa nakuhaan og usa ka pakete nga pinauga nga marijuana.
Laing usa ka 14-anyos nga lalaki nga taga Barangay Tungkay sa maong siyudad ang nadakpan.
Gibana-bana nga nagkantidad og P60 mil ang 625 ka punoan sa marijuana nga nasakmit.
Gikatakdang pasakaan og kaso ang nakaeskapo nga si Cabiles samtang gitanggong sa Toledo City Police Station ang dinakpan nga si Laspoña ug gidala sa City Social Welfare and Development Office ang 14-anyos. - /GMR) (BANAT NEWS)