Oil spill nakapabalaka

CEBU, Philippines — Naalarma ang kagamhanan sa lungsod sa San Fernando sa pagkatap karon sa asite diha sa ilang kadagatan niadtong Domingo sa hapon.

Si Mayor Lakambini “Neneth” Reluya nanawag dayon sa coast guard tungod sa reklamo gikan sa mga taga Barangay Panadtaran bahin sa oil spill. Sa inisyal nilang pakisusi, nanghugas o nanglabay og asite sa kadagatan ang barge nga iya sa pribadong kompaniya nga kontraktor sa Taiheiyo.

Gawas nga maapektahan ang ilang mga residente nga nanginabuhi sa lugar naapektahan sa oil spill ang protected area tungod kay naa diha ang mga bakhawan ingon man naa diha ang talagsaon nga klase sa corals ug mga isda.

Adunay  gipamutang nga mga kagamitan aron dili makakatag ang maong oil spill. Siya mipahibalo nga mopasaka sila og kaso sa mga responsable niini.

Si Konsehal PJ Medalla, chairman sa Committee on Environment nitataw nga iyang ipaabot sa kaubanan niya sa konseho ang suliran aron ilang mapaubos sa ilang imbestigasyon ang maong hitabo.

Sa paghimo sa maong balita, naghimo na og imbestigasyon ang Philippine Coast Guard kun kinsa maoy angay manubag niini. Gibana-bana nga anaa sa duha ka ektarya ang mangrove forest ang naapektahan niini. (BANAT NEWS)