CEBU, Philippines — Upat ka mga pinuy-anan sa Barangay Pajo nga giingong gigamit isip suyopanan, ang gimarkahan kagahapon aron pagpahibalo sa publiko nga kini drug den.
Apan ang Commission on Human Rights miingon nga kalapasan kini sa tawhanong katungod sa mga nagpuyo sa lugar.
Nangulo sa operasyon si Barangay Kapitan Junard “Ahong” Chan uban ang hepe sa Lapu-Lapu City Police Office nga si Senior Supt. Romel Cabagnot.
Ang grupo ni-spray sa mga pultahan sa maong mga panimalay og “Identified as Drug Den Area.” Usa sa mga nag-abang nga babaye nga anaa sa listahan sa nalambigit sa ilegal nga drugas ang naabtan didto ug kini miangkon nga tiggamitan og drugas apan wala magpayuhot.
Sunod nga gipintalan ang laing balay nga gipuy-an gihapon og babaye kinsa sa sinugdanan nilimod apan sa kaulahian miangkon nga drug user siya, nagpabayad siya og tag P10 sa mosuyop diha sa iyang giabangang lawak.
Ang ikatulong balay nga gipintalan usab niini wala magkadimao ang tinubagan sa pangutana sa mga otoridad, apan matud pa sa mga silingan nadaut ang utok niini tungod sa ilegal nga drugas.
Si Rodolfo Larona, tag-iya sa compound diin mahimutang ang maong mga boarding houses maoy mireklamo sa barangay kay wala na siya kaagwanta sa bisyo sa drugas sa iyang mga tenants. Nasuta nga halos tanan sa dapit miangkon nga tiggamitan og shabu ug sila gikatakdang ipatawag sa Lapu-Lapu City Police Office ug sa barangay. Si Chan miingon nga ang nanag-iya sa mga balay nga gihimong suyopanan sa mga nag-abang maoy nisumbong sa barangay.
Sumala pa ni Chan, karong adlawa adunay mga tiggamitan og drugas sa iyang barangay nga motahan na sa ilang kaugalingon.
Nagpadayon ang paghangyo ni Chan sa mga nalambigit sa ilegal nga drugas sa ilang lugar sa pag-undang sa paggamit ug pagbaligya niini. Giangkon ni Chan, ang pagpahigayon nila sa Shame Campaign subay sa tinguha nga mahimong drug free ang iyang barangay.
Apan si Senior Supt. Cabagnot sa iyang bahin nibutyag nga ilang hatagan og kahigayonan ang mga nalambigit sa paglimpyo sa ilang mga pangalan ug ang pagpahigayon sa shame campaign ipahigayon nila tibuok kabarangayan.
Apan si Atty. Arvin Odron, Regional Director sa Commission on Human Rights Central Visayas nipadayag nga wala sila magdahom nga adunay local version sa Shame Campaign nga mahitabo dinhi sa Sugbo.
Sumala pa ni Odron, ang maong programa nahitabo na sa Manila panahon sa administrasyon ni Mayor Alfredo Lim.
Matud pa niya sa bisan unsa unta nga lakang sa gobiyerno nga maayo ang tumong, dili unta nila buhaton pinaagi sa ilegal nga paagi sama sa pagtamak sa tawhanong katungod sa mga tawo.
Dugang pa ni Odron, basta ang tawo nga na- labelled o suspetsado nga adunay koneksyon sa illegal drugs ang iyang kaluwasan ug seguridad otomatiko nga makompromiso.
“Madungog na lang nato ang inosenteng sibilyan nga gipusil, unya ang mga tawo bias, moingon dayon na maayo ra kay drug addict,” matud pa niya.
Base sa legal framework ang korte ra maoy adunay katungod nga mohukom nga sad-an ang usa ka tawo.
Matud pa ni Odron, ilahang i-dokumento ang tanan, inspeksyonon ang tanang mga balay nga gi identify, ug mokuha sila og pamahayag sa mga residente, lokal opisyal ug sa kapulisan.
Gusto sa CHR nga sigurohon gyud nga pinasubay sa human rights standards nga gisitar sa international treaties ang tanang buhaton sa gobiyerno. (FREEMAN)