Sugbo alerto sa bird flu

CEBU, Philippines – Gialerto karon sa nagkadaiyang mga ahensya sa gobiyerno sa Sugbo ang ilang monitoring sa tanang mga namuhi, nibaligya, magdala og mga inihaw nga mga manok tungod sa hulga sa bird flu nga nakasulod na dinhi sa nasud partikular didto sa Luzon.

Ang Department of Veterinary Medicine and Fisheries (DVMF) sa Dakbayan sa Sugbo mipahugot karon sa ilang pagbantay tungod sa memorandum circular nga gi-issue sa Department of Agriculture, Bureau of Animal Industry pag-ban dinhi sa Visayas niining mga baligya nga binuhi, ihalas nga mga langgam, pugo, manok hiniktan, pato, bebe, ug uban pang poultry products gikan sa Luzon tungod sa Avian Influenza.

Niadtong adlaw’ng Sabado, gipangsakmit sa mga meat inspectors ang mga baligyang ulo sa mga manok sa usa ka tindahan og karne.

Ang pangulo sa DVMF, Dr. Alice Utlang mi-isyu og confiscation certificate sa tag-iya sa maong mga karne human ilang nasayran nga gikan kini sa Manila.

Ang mga inspectors mi-spray usab og disinfectant sa mga nasakmit nga poultry meat sa wala pa nila kini gilubong sa compound sa ihawan sa North Reclamation Area.

Matud ni Utlang ang tag-iya miangkon nga wala siya masayod nga gidili sa pagkakaron ang pagpasulod og poultry products gikan sa Luzon padung dinhi sa Kabisay-an kay wala pa siya masayod nga aduna diay bird flu outbreak sa Pampanga.

Sigon ni Utlang human nila madawat ang kopya sa memorandum niadtong adlaw nga Biyernes mipahigayon dayon sila og information dissemination sa mga supermarkets, post abattoir ug pampublikong merkado.

Gipasalig usab sa Provincial Health Office Chief Rene Catan nga luwas pa gihapon ang Sugbo gikan sa avian influenza o ang H1N1 Avian Virus nga mas naila sa tawag nga bird flu.

Karong adlawa adunay himuong panagtigom ang mga kadagkoan sa PHO uban sa mga district hospitals, health offices aron hisgotan ang kabahin niini.

Gibutyag usab ni Catan nga hugot karon ang pag-monitor sa mga poultry farms sa probinsya sama sa  Bantayan ug Asturias.

Gipahibalo usab sa Department of Health (DOH-7) nga aduna sila’y paigong tambal ug trained nga personnel nga motagad sa mga tawong mataptan og bird flu sa rehiyon.

Si DOH-7 medical officer Dr. Van Phillip Baton miingon nga kon dili kaayo grabe  mahimo ra kining atimanon sa rural health units o barangay health centers. Kadto rang grabi na ang kinahanglan na kini dalhon sa hospital.

Ang sintomas sa tawong matakboyan og bird flu mao ang taas nga hilanat, malaise, cough, sore throat, ug muscle aches. Ubang early symptoms mao ang abdominal pain, chest pain and diarrhea.

Dugang niya ang infection posibleng mosangpot ngadto sa severe respiratory illness.

Matod usab niya, ang tawo nga matakboyan niini dili hinuon makatakod sa laing tawo. Ang transmission sa bird flu mao ang “close contact” sa nasakit nga langgam.

Si Agriculture Secretary Emmanuel Piñol mimando na sa pag-ban sa tanang poultry products gikan sa Luzon apan dili apektado ang importasyon sa mga piso, itlog nga hapit nang mapusa, ug uban pang mga langgam apan pahugtan gyud og maayo ang pagpatuman sa kwarantina.

“This means that chicken brought in from the United States intended for shipment to the Visayas or Mindanao may not be taken out of the boxes and must be loaded directly into the connecting flights,” dugang pa sa kalihim.

Ang tigpamaba sa Malacañang, Ernesto Abella mipasalig nga way price increase sa karne sa mga manok tungod niining bird flu outbreak didto sa usa ka quail farm sa San Agustin, San Luis, Pampanga. Wa pa hinuoy natala nga tawong natakboyan niini dinhi. – Decemay P. Padilla, May Miasco ug report gikan sa Wires/EIM (BANAT NEWS)