CEBU, Philippines - Dili tinuod ang nikatap nga balita nga nipanaw na si Cebu Archbishop Emeritus Ricardo Cardinal Vidal sumala pa sa tigpamaba sa Archdiocese of Cebu Msgr. Joseph Tan.
Matud pa ni Tan, nakadawat na sila og mga impormasyon nga sa miaging semana pa diay gipasa-pasa ang maong balita apan iyang giklaro nga dili kini tinuod. Wala pa sila masayod sa artsidiyosisis kung kinsay nagpaluyo niini ug kun unsay ilang tumong sa pagpakatap niining sayop nga balita.
Sumala pa ni Tan, maayo ang kahimtang ni Vidal human iyahang nahinabi ang nurse niini diin stable ang vital signs ug blood sugar niini.
Dugang pa ni Tan, kung adunay mga dagko nga panghitabo sa Archdiocese dili kini nila tagoon ug mopagawas gayud sila og balita bahin niini ug sila mismo ang moisyu ug dili si bisan kinsa lang.
Awhag ni Tan ngadto sa tanang mga tawo nga respetohon ang Cardinal ug ilakip kini sa ilang pag-ampo sa kanunay ang maayong panglawas niini.
Ang pamahayag giluwatan ni Tan, human ang Banat News gipangutana sa pipila ka mga tigbasa niini kon tinuod ba nga nitaliwan na ang Cardinal. (BANAT NEWS)