Plite sa V-Hire mahal kung weekend
CEBU, Philippines - Tungod sa pagdoble sa gidaghanon sa mga pasahero sa adlaw nga Sabado ug Domingo, nisaka sab sa P20 hangtud P40 ang plite sa mga van-for-hire gikan sa terminal sa Kamagayan, Siyudad sa Sugbo.
Ang plite sa mga rota paingon Simala, Sibonga; Moalboal ug Pinamungajan ang naapektuhan sa pagsaka tungod sa mga back-up vans nga gipabiyahe aron mohatud sa mga pasahero.
Matud ni JR Milagrosa, dispatser sa terminal sa rota nga Moalboal, nga ang pagsaka sa plite nagdepende sa sabot sa drayber ug sa pasahero.
Ang nahitabo gisaway ni Konsehal Pastor “Jun” Alcover Jr., pangulo sa committee on labor and cooperatives, kinsa niingon nga dali ra kaayong makapasaka sa plitehan ang mga V-Hire gumikan kay ilegal ang terminal ug dili kini makaayo sa mga pasahero.
“Ang problema man gud diha kay illegal pa man na ilang parking. So kanang ilang mga collection diha, wa jud na mobagay sa legal nga taripa,” matud ni Alcover.
Sila si Alcover ug Konsehal James Anthony Cuenco nisang-at og reklamo sa buhatan ni Presidente Rodrigo Duterte batok ni Mayor Tomas Osmeña tungod sa pagtugot sa maong terminal nga kalapasan sa ordinansa sa siyudad.
Walay plano si Osmeña nga ipasira ang terminal hinuon gilihok na nila ang paghimo niini nga legal.
Giawhag ni Alcover ang mga pasahero sa pagreklamo ngadto sa Land Transportation Franchising and Regulatory Board sa pagsaka sa plitehan.
Si Osmeña sa iyang bahin nagkanayon nga wala siyay mahimo sa pagsaka sa mga plite sanglit negosyo kini sa mga V-Hire operators ug drivers.
“What I said to them is don’t ride. Do not ride. What am I supposed to do? Make it 100? No, it’s their business,” sigun sa mayor.
Dugang niya nga dili niya madektaran ang “law on supply and demand.” (BANAT NEWS)
- Latest
