Pagpalambo sa Cansaga Bay natanggong

CEBU, Philippines - Natanggong ang pagpalambo sa dapit duol sa Marcelo B. Fernan Bridge paingon sa may Cansaga Bay sa Barangay Paknaan gumikan sa kasong giatubang sa kagamhanan sa Dakbayan sa Mandaue.

Kini ang gibutyag ni Mayor Gabriel Luis “Luigi” Quisumbing human ang unang kontraktor nisang-at og kaso gumikan sa pagpasulod sa laing kontraktor sa hinapos nga bahin sa termino ni kanhi mayor ug karon Kongresista Jonas Cortes sa ikaunom nga distrito.

“In effect, all development in that particular area on hold for the time being until maklaro namo where the legal process will take us suit so to speak,” matud ni Quisumbing sa niaging 888 News Forum sa Marco Polo Plaza.

Ang pagpalambo sa lugar pinaagi sa reclamation project maoy usa sa nalatid sa Executive-Legislative Agenda ni Quisumbing sa unang tulo ka tuig niya nga administrasyon.

Ang kagamhanan sa siyudad ug ang Mandaue Land Consortium unang nisulod sa Contract of Reclamation niadtong Marso 29, 2001 apan wala napatuman human sa kapin sa 10 ka tuig.

Kini ang hinungdan nga ang City Legal Office nirekomendar kang Cortes sa pagsulod sa laing Joint Venture Agreement tali sa Globalport 900, Inc. nga gipangulohan ni Kong. Michael Romero sa 1-Pacman Party-list niadtong Enero 6, 2012 alang sa P9 bilyones nga “global city”.

Samtang gipahibawo ni Quisumbing nga gisusi na usab nila ang kahimtang sa 50-ektarya nga reclamation project sa Barangay Labogon nga giingong wala gigamit sa siyudad sukad niadtong 1990s.

 Matud ni Dr. Danilo Dionson, anak ni anhing konsehal Magno Dionson, nga bugtong ang ihawan lang ang nagbarug nga edipisyo sa bahin nga luna sa siyudad.

Si Labogon Barangay Kapitan Renato Suson nipahibawo kang Dionson nga ang mga pribadong kompaniya ang naa sulod sa reclamation project sama sa Unified Global Shipping Corp., AYL Trading, Unilink Shipping Corp., Liquid Packaging Corp., Golden Dragon Fast Craft Builders, Golden Bridge Shipping, VBL Food Chain, Inc., ETA Shipping Lines, Jomalia Shipping Corp., ug Socor Construction Corp. (BANAT NEWS)