CEBU, Philippines - Kapin sa tunga sa milyon nga balor sa shabu, nasakmit gikan sa 15 ka tawo atol sa managlahing buy- bust operation.
Cebu City
Nasikop sa gihimong intensified police operation sa Cebu City Police Office sa sulod sa usa ka pension house nga nahimutang sa Sitio Bayabas, Brgy Basak San Nicolas niadtong Miyerkules sa gabii.
Nadakpan si March Quijano nga taga Sitio Kaimito sa maong barangay ug ang gituohang amo niini nga si Hector Rivera nga taga N. Bacalso Ave., habig sa Brgy Mambaling.
Matud ni PSIns. Narrolf Tan, Deputy Chief sa City Intelligence Branch nga subject nila si Quijano kinsa usa ka street level nga nag-abang og duha ka kuwarto sa maong pension house. Apan dihang ila kining gisulong, nitug-an kini nga anaa usab ang iyang amo sa maong pension house.
Sumala ni Tan, si Rivera usa ka high value target ug nasikop na niadtong miaging tuig apan nakapiyansa.
Nasakmit gikan kang Quijano ang unom ka gagmay’ng pakete sa gituohang shabu samtang usa ka daku, duha ka medium ug unom ka gagmay’ng pakete ang nakuha gikan kang Rivera. Mobalor sa P477,664 ang maong mga shabu nga adunay timbang nga 132 gramos.
Carcar City
Gituohang kanhi drayber sa giilang high value target sa Dakbayan sa Carcar nga nakalas niadtong nilabay’ng tuig, nasikop sa buy-bust operation sa mga sakop sa Carcar City Police Station sa Sitio Lower Tawog, Brgy Valladolid.
Ang nasikop mao si Joel Elloren kinsa giingong nipuli sa iyang kanhi amo nga si Dionisio “Jojo" Racho, usa ka high value target kinsa napatay sa engkwentro tali sa kapolisan.
Nasayran nga nakuha gikan kang Elloren, ang pipila ka putos sa drugas, P950 nga gituohang halin, usa ka kalibre 45 nga pistola, tulo ka magazine ug 12 ka bala.
Toledo City
Sa Dakbayan sa Toledo, upat ka babaye ang nadakpan sa buy-bust operation niadtong Miyerkules sa kadlawon.
Ang mga nasikop mao silang Rosy Paquibot, Rhoda Acuña, Shielo Bubuli ug Manilyn Ferrater nga namaligya og ginadiling drugas sud sa lodging house.
Silang upat anaa sa drugs watchlist sa Toledo City Police ug usa ka buwan nga gi-monitor.
Nakuha gikan sa mga dinakpan ang duha ka medium ug 11 ka gagmay’ng pakete sa gituohang shabu ug mga drug paraphernalia.
Danao City
Sa Dakbayan sa Danao, siyam ka nalambigit sa ilegal nga drugas ang nadakpan atol sab sa buy-bust operation diin mokabat sa kapin P200 mil nga kantidad sa gituohang shabu ang nasakmit.
Unang operasyon nahitabo sa dalan Pio del Pilar sa Brgy Poblacion diin nasikop si Rommel Abad kinsa nakuhaan og 30 ka gagmay’ng pakete sa gituohang shabu ug P400 nga gituohang halin.
Laing buy-bust gihimo sa dalan Olivar diin nadakpan si Rodel Pajares ug nasakmitan og P500 nga gituohang halin sa usa ka gamay’ng pakete sa gituohang shabu.
Nadakpan sab ang 16-anyos nga lalaki kinsa nakuhaan og gamay’ng pakete sa gidudahang shabu.
Nasikop sab si Junnel Formentera ug Junnel Laureto sa Brgy Suba kinsa nakuhaan og pinaketeng gituohang shabu.
Laing nadakpan mao si Ryanee Alerta nga taga Compostela kinsa nasakmitan og 25 ka gagmay’ng pakete sa gidudahang shabu.
Dugang nadakpan mao si Bernardo Mojada nga taga dalan F. Ralota nga nakuhaan og usa ka gamay’ng pakete sa gituohang shabu.
Laing nadakpan sa dalan Duterte mao si Ruel Ramonida. Nakuhaan kini’g usa ka gamay’ng pakete sa gidudahang shabu ug P700 nga gituohang halin niini.
Sikop sab si Hilario Nasara ug nasakmit gikan niini ang 50 ka gagmay’ng pinaketeng shabu nga gibanabanang nagkantidad og P130 mil. Nasakmit sab ang P600 nga gituohang halin niini.
Consolacion
Nadakpan sa Brgy Nangka sa Lungsod sa Consolacion silang Windel Ytag Abucay ug Dexter Singson kinsa nasakpang nanuyop ug nasakmitan sila og tagsa ka gagmay’ng pakete sa gidudahang shabu. Romeo T. Limpangog, Rowena D. Capistrano, Camille L. Pateres, Raziel Sumayang (BANAT NEWS)