CEBU, Philippines - Sukad sa bagyong Yolanda niadtong Nobiyembre 2013, nagpabiling ngiob ang kadalanan sa Dakbayan sa Bogo City panahon sa kagabhion.
Kini ang gibutyag ni Mayor Carlo Martinez human hangtud karon wala gihapon gipatuman sa Department of Public Works and Highways ang P51 milyones nga street lighting project.
“Kung gikan ka sa Tabogon, makahibawo ka nga Bogo na kay ngitngit. Mao sab kung gikan ka sa San Remigio,” matud ni Martinez.
Ang kalangan maoy nakaaghat sa kagamhanan sa siyudad sa paggahin og P12 milyones karong tuiga alang sa street lighting nga gamitan og solar system. Ang P51 milyones alang unta sa pagpaayo sa nagusbat nga bag-ong Bogo City Hall nga gibuksan niadtong Abril 2013, pipila ka buwan sa wala pa ang bagyong Yolanda.
Apan matud ni Martinez nga naunhan sa pagpagawas sa insurance nga gibayad sa Government Service Insurance System (GSIS) balor og P76.8 milyones maong ila gipausab ang P51 milyones nga alang na sa street lighting project. (BANAT NEWS)