CEBU, Philippines - Nalakip sa watchlist sa drug personality nasikop sa anti-drug operation sa mga tinugyanan sa Philippine Drug Enforcement Agency (PDEA)-7 niadtong Lunes sa gabii.
Ang nasikop mao si Lloyd Bontilao, 31 anyos, taga Barangay Pit-os, Dakbayan sa Sugbo.
Matud ni Leia Albiar, ang tigpamaba sa PDEA-7, nga ang kalambigitan ni Bontilao sa ilegal nga drugas naabot sa Barangay Anti-Drug Abuse Council hinungdan nga gipahigayonan kini og proper validation sa ilang buhatan.
Human sa dul-an duha ka bulan nga surveillance ug nakonpirmar ang binuhatan niini, gihimo dayon ang operasyon batok niini.
Nasayran nga nakonpiskar gikan kang Bontilao mao ang 50 gramos nga gituohang shabu nga mobalor og dul-an sa P181 mil.
Sa Dakbayan sa Talisay, nasikop sab pinaagi sa buy-bust operation ang 18 anyos nga si Chester Villaceran alyas Kulot nga giingong tigpayuhot og ilegal nga drugas sa Sitio Magay, Barangay Tanke niadtong Lunes sa gabii.
Nakuhaan si Villaceran og 17 ka gagmay’ng pakete sa gituohang shabu ug wala sab makaipsot sa kapolisan ang tulo niya ka mga suki nga sila si Noe Eben, Arnel Burgos ug Raynard Morano.
Nasikop sab sa managlahing operasyon sa Lapu-Lapu City Police Office ang lima ka gikatahapang drug pusher nga naglakip sa usa ka babaye.
Sa Presinto 3, ilang nadakpan sila si Vercel Vidal alyas Titing ug Genevieve Navarro nga taga Bacolod City kinsa unang nagpaila nga si Mabelle Talidron nga taga La Carlota City, Negros Oriental.
Target sa maong operasyon si Vidal kinsa nakuhaan og mga pinaketeng shabu samtang si Navarro naatlan sab sa maong lugar.
Sa laing buy-bust operation nga gihimo sa Brgy Poblacion, nasikop si Junard Tumulak kinsa nakuhaan og duha ka gagmay’ng pakete sa gidudahang shabu.
Dugang nadakpan mao sila si Rosendo ug Aminish Cabalhug sa BrgyCanjulao kinsa nasakmitan og walo ka gamay’ng pakete sa gituohang shabu. Rowena D. Capistrano, Romeo T. Limpangog, Gabriel C. Bonjoc, ug Raziel Sumayang (BANAT NEWS)