Ayaw pasagdi ang kadagatan – BFAR

CEBU, Philippines - Gipanawagan sa direktor sa Bureau of Fishery and Aquatic Resources (BFAR-7) sa Dakbayan sa Talisay ug uban pang Local Government Units nga mohimo og programa labot sa pag-ugmad sa kadagatan aron managhan ang mga mananap niini.

Si BFAR-7 Director Allan Poquita nagkanayon nga dili angay nga kalimtan ang kadagatan kay dakong tabang kini sa katawhan.

Asoy pa niya nga daghang mananagat ang padayon nga nanagat sa tinarong nga paagi apan daghan sab ang nag-abusar sa kadagatan. Iyang gipasabot nga sama sa pag-ugmad sa umahan pinaagi sa pagbutang og patambok sa yuta.

“Pareha gud sa umahan nga atong butangan og fertilizer aron manambok ang atong gitanom. So, mao sab unta diha sa atong kadagatan dili kay sige lang ta og kuha unya wala ra tay buhaton sa atong dagat,” nagkanayon si Poquita. Iya sab gihangyo ang tanang LGUs nga unta mosuporta sa kampanya sa BFAR nga zero illegal activities.

Base sa iyang report, ang Talisay aduna gihapo’y mipahigayon og ilegal nga panagat sama sa ubang lugar. Hinuon siya nanghinaut nga unta molihok ang mga opisyal ug hatagan og bili ang kadagatan nga dakong tabang sa inadlaw-adlaw nga pagpakabuhi sa kalibutan. (BANAT NEWS)