Polis nanghinol og laing polis

CEBU, Philippines - Usa ka polis gidakop kay giingong “nangamang” og dalagang polis ug iyang gigakos, gihagkan ug gihiram ang pribadong parte sa kalawasan sulod sa Regional Public Safety Battalion (RPSB) headquarters sa Lungsod sa Sibonga kaniadtong Huwebes sa kaadlawon.

Si PO3 Eugenio Santillan, 40, minyo ug sakop sa Bantayan Police Station ug nag-training sa RPSB, gidakop sa mga kauban niya nga polis kay mireklamo ang 26-anyos nga policewoman nga nagranggo pa og Police Officer 1 kay siya gimolestiya niini.

Gipugngan lang sa Banat News ang ngalan sa policewoman aron maprotehean ang iyang kadungganan, ilabi na nga siya usa ka dalaga.

Matud pa reklamo sa policewoman diha sa Sibonga Police Station nga samtang natulog siya sa iyang barracks mga alas tres sa kaadlawon, nahigmata siya diha nga iyang nabatyagan nga may tawo nga migakus kaniya ug miligo niya’g mga hawok.

Gamit ang flashlight sa iyang cellphone, nailhan sa policewoman ang tawo nga mimolestiya kaniya nga mao si Santillan. Midali pagpanlimbasog ang policewoman ug midagan gawas sa iyang barracks.

Ang policewoman miingon nga gisunod siya niini nga nagsige’g pangayo’g pasaylo sa iyang nahimo ug miingon nga nabuhat niya kadto tungod kay nahigugma siya sa dalagang policewoman.

Nangayo’g tabang ang policewoman sa ubang mga polis nga maoy midakop ni Santillan ug gidala sa Sibonga Police Station, ug gipasakaan na kini og kaso nga Acts of Lasciviousness sa hukmanan.

Ang kapolisan sa Sibonga miingon nga si PO3 Santillan nagmahay gyud sa iyang nahimo, ilabi na nga ang policewoman mopasaka pa gyud kaniya og kasong administratiba.

Si Santillan gibuhian na hinoon kay nakabutang na og piyansa sa iyang kaso. - /EIM) (BANAT NEWS)