Kanhi polis, guard sikop sa druga

CEBU, Philippines - Dul-an usa ka milyon ka pesos nga kantidad sa shabu ang nasakmit ug nasikop usab ang kanhi polis, kanhi gwardiya nga pulos gidudahang nalambigit sa ilegal nga drugas sa managlahing anti-drug operation niadtong nakalabay nga adlaw.

Sa Dakbayan sa Sugbo, giposasan sa mga sakop sa Mambaling Police ang 26-anyos nga kanhi guwardiya nga si Anthony Angana human napalitan og drugas sa kapolisan diha sa Sitio Naba, Barangay Mambaling.

Ang hepe sa Mambaling Police , Senior Inspector Edward Sanchez, nga nangulo sa operasyon miingon nga bag-ong player sa drugas sa ilang dapit ang suspetsado.

Nakuha sa mga polis gikan sa suspetsado ang daghang pinaketeng shabu nga mikantidad og P800 mil.  Gitug-an  ni Sanchez nga ang mga silingan niini maoy niduol kanila ug nisumbong bahin sa negosyo niini.

Samtang usa ka kanhi polis ug laing pito ka mga gikatahapang drug pushers ang nadakpan sa managlahing buy-bust operations sa kapolisan sa Danao City Police Station ug Lapu-Lapu City Police Office (LLCPO) ug nasakmit ang mga pinaketeng shabu.

Si Senior Police Officer One Arnold Labine sa Danao City Police Station miila sa kanhi polis nga nadakpan nga mao si Benjamin Enriquez Borla Jr., taga dalan Olivar, Barangay Poblacion sa nahisgotang dakbayan.

Nasakmit gikan sa suspetsado ang 20 ka gagmay nga paketeng shabu, P200 nga buy-bust money ug P800. Matud ni Labine si Borla kanhi sakop sa Compostela Police Station.

Dugang nadakpan sa laing buy-bust operation sila si Joseph Gonzales Hermocilla, 29, ug ang kauban niining babaye nga si Trexie Capoy, 21, human nakuhaan og 20 ka gagmay nga paketeng gituohang shabu, P200 nga marked money ug P600.

Samtang sa Lapu-Lapu City Police Office (LLCPO) nasikop usab nila ang lima ka gikatahapang pushers nga sila si Ribomapel Intong Wagwag, Mark Tuedy  Dionaldo Cabido, 22.

 Dugang nadakpan si Carlo Paquibot Matgidios, 30, Michael Mangubat Salazar,34, ug Kevin Obaob, 22.

Samtang sa lungsod sa Argao, kapin sa P100  mil nga kantidad sa shabu ang nakuha sa mga polis gikan sa 39 anyos nga si Kent Villavelez Galeos human sa pagronda sa iyang balay sa Barangay Tulic pinasikad sa search warrant.

Nakuha sa mga polis gikan kaniya ang 12.96 gramos nga shabu nga mikantidad og P152,928 ingon man mga drug paraphernalia.

Ang search warrant giisyu  ni Regional Trial Court Branch 21 Judge Maximo Perez.

Sa Dakbayan sa Talisay, gironda sa kapolisan ang manag-amahan nga Deolan Aparici alyas Deolan nga maoy subject sa operasyon apan nakaikyas samtang nasikop ang iyang anak nga si Dixie Rob Neri Aparici, 18, diha sa ilang balay sa Sitio Cassare, Barangay Cansojong.

Nasikop usab ang giingong ilang kustomer nga si Bryan Pepito, 28 , taga Sitio Kalbasa-an, Barangay Campo 7, lungsod sa Minglanilla.

Nahipos sa kapolisan ang 12 ka gagmay nga paketeng shabu gikan sa anak nga Apareci samtang unom gikan kang Pepito nga nipalit og drugas sa maong lugar. Jojo Ugdol, Rowena Capistrano, Romeo Limpangog ug Gabriel Bonjoc (BANAT NEWS)