CEBU, Philippines - Gipaabot nga dili na unya maghuot ang mga priso sa Cebu City Jail kay sa dili madugay masugdan na unya ang konstraksiyon sa bag-ong building nga giplanohang tukuron sulod sa compound sa city jail.
Si Konsehal Dave Tumulak, Deputy Mayor for Police Matters nagkanayon nga nagpahibawo kanila ang Bureau of Jail Management and Penology (BJMP) nga magtukod sila og bag-ong building. Human sila makakuha og P329 milyones nga pundo alang sa katukuran sa dugang jail building sa napulo ka prisohan dinhi sa rehiyon diin ang Siyudad sa Sugbo adunay daku nga bahin nga mokantidad og P101 milyones.
Gitinguha sa BJMP nga magtukod og 5 units Type-1 4 storey building alang sa Cebu City Jail male dormitory ug Type-A 4 storey building alang sa female dormitory.
Nasuta nga ang Cebu City Jail mao ang ikatulo sa adunay labing daghang piniriso sunod sa Quezon City ug Manila.
Posibleng mahitabo sunod buwan ang bidding niini kay karong tuiga gyud ipatuman ang pagtukod og dugang jail building nga ipahimutang sa bakanteng luna sa sulod sa compound sa city jail.
Nasayran nga ang kapasidad sa city jail, anaa lang sa kapin usa ka libo apan sa kasamtangan, moabot na sa kapin 4 mil ka priso ang anaa sa sulod ug naghuot na. Nunot niini, hangyuon usab ni Tumulak ang kapolisan nga magbutang og personnel sa maong pasilidad kay nagkuwang og tawo ang maong prisohan. (BANAT NEWS)