ASEAN Summit gipangandaman
CEBU, Philippines - Anaa sa 200 ka polis ang ipakatap sa Dakbayan sa Sugbo alang sa paghatag og seguridad sa ika-30 nga Association of Southeast Asian Nation (ASEAN) Summit karong Abril 3 hangtud Abril 7.
Gibutyag ni PSSupt. Joel Doria, director sa Cebu City Police Office nga mo-deploy na sila sugod karong Marso 30, lima ka adlaw sa dili pa magsugod ang maong kalihukan nga tambongan sa mga representante sa nagkalain-laing mga nasud sa Asya.
Tungod sa mga importanteng tawo nga motambong sa kalihukan, si Doria nagkanayon nga maglaum na silang daan nga adunay pagpanghulga sa seguridad.
Nunot niini, mogamit sab sila og force multipliers alang sa intelligence monitoring.
Si Gobernador Hilario Davide, III mosuporta sa kapolisan kun idayon nila ang planong pagpalong sa signal sa pipila ka lugar nga himoan sa ASEAN Summit, kay angay unahon ang seguridad sa mga delegado.
Dugang niini nga ang Kapitolyo mopasiugda og panihapon sa Capitol Social Hall alang sa mga delegado apan ila pang gi-finalize ang petsa alang niini. Christell Fatima M. Tudtud ug Le Phyllis F. Antojado (BANAT NEWS)
- Latest
