Kabalayan nasunog sa Talisay

CEBU, Philippines - Gilamoy sa dakong sunog ang 20 ngadto sa 30 ka panimalay sa may Sitio Kilawan, Brgy. Tangke, Dakbayan sa Talisay kagahapon sa hapon.

Sumala pa nga nadawat sa kabomberohan sa Dakbayan sa Talisay ang alarma alas 2:10 sa hapon ug nakontrolar alas tres pasado na sa hapon. Matud pa ni Chief Insp. Joel Abarquez ang Fire Marshall sa dakbayan, ilaha pa ipaubos sa imbestigasyon ang hinungdan sa sunog nga nagsugod sa panimalay ni Vic Labajo nga ginama sa light materials.

Sumala pa ni Abarquez, ilaha pa paladman ang hinungdan sa sunog tungod kay mag-usab-usab pa ang pamahayag ni Labajo.

Gibutyag ni Abarquez, naglisod sila pagtubag sa alarma tungod kay sudlonon kaayo ang lugar ug gibanabana nilang 20 ngadto 30 ka balay naugdaw nga padayon pa nilang gisubay karon.

Gibana-bana nga P350 mil ang danyos sa maong sunog nga giisa nila ngadto sa 2nd alarm ug wala’y natala nga naangol o nakalas sa maong insidente.  - /EIM) (BANAT NEWS)