3 Romanians gikasohan na

CEBU, Philippines - Padayong gipangita sa kapolisan ang laing duha ka Romanian nga gikatahong nalambigit sa sindikato sa automated teller machines (ATM) skimming human nasikop ang tulo nila ka kauban.

Si Police Senior Superintendent Jonathan Cabal, hepe sa Regional Intelligence Division sa Police Regional Office-7, niingon nga ilang nakuha ang usa ka puti nga 2007 Toyota Camry nga dunay plate number nga ZKM 158 sa parking lot sa Ayala Center Cebu pasado alas 8 sa gabii niadtong Domingo.

Matud ni Cabal nga ang security personnel sa maong mall maoy niila sa sakyanan nga maoy gigamit sa tulo ka Romanians nga unang nadakpan sa National Bureau of Investigation.

Ang maong sakyanan gibiyaan niadtong Marso 17 sa gabii ug narehistro sa pangan ni Sebastian Rama Oros sa Villa Sol, Colorado Street, A8-AB sa Angeles City, Pampanga.

Nakita sa security personnel ang sakyanan nga abli ang bintana niini sa atubangan ug nakita ang usa ka paper bag nga puno sa kwarta nga kantidad og P3 milyones.

Sigun pa ni Cabal nga human nauli sa guwardiya ang kwarta sa mga Romanians gitagaan pa unta og pahalipay ang guwardiya apan kini nibalibad.

Human nakabiya sa maong mall ang mga Romanians sa sunod nga gabii sab kini nadakpan. Si Cabal niingon nga lagmit ang maong sakyanan ang gigamit sa laing duha ka langyaw nga nibalik sa mall. Ang sakyanan ang anaa karon sa PRO-7 headquarters.

Sa pagsubay sa mga polis sa sakyanan ilang nakita ang laptops nga dunay mga passwords nga gisubay na karon sa cybercrime unit alang sa imbestigasyon.

Si Cabal nagduda nga ang duha ka Romanians ang kauban sa international syndicate sa ATM skimming.

Samtang pormal na nga napasakan sa NBI-7 og kasong kalapasan sa Republic Act 8484 o ang Access-Devices Regulations Act in relation to Republic Act 10175 o ang Cyber-Crime Prevention Act.

Ang mga akusado mao sila si Ionut Alexandru Mitrache, Razvan Aurelian Stancu ug Costel Ion ug usa ka Mircea Iorda alyas Jozsef Gal nga gipangita pa.

Ang abogado sa mga akusado nga si Atty. Christopher Ruiz niingon nga ang mga Romanians niinsister nga inosente sila ug nangayo og tabang nga mapanalipdan ang ilang katungod. Jojo C. Ugdol ug Le Phyllis F. Antojado (BANAT NEWS)