CEBU, Philippines - Gitulis ang usa ka babaye sa notadong tulisan kauban ang usa ka menor de edad samtang kini nag-atang og kasakyan duol sa usa ka dakong mall sa Brgy Tabunok, Dakbayan sa Talisay niadtong Biyernes sa hapon.
Ang biktima mao si Jeramie Jaloven, 30, taga Brgy Poblacion, sa Dakbayan sa Toledo.Samtang ang suspek nailhan nga si Don Vincent Gabriana alyas Balulong, 24, taga Sitio Mananga 1, Brgy Tabunok ug ang iyang kauban nga 17 anyos.
Si SPO2 Yvonne Ilustrisimo sa Talisay City Police Station nibutyag nga nag-atang og masakyan ang biktima sa dihang giduol sa duha ka suspek ug diretsong gitionan og kutsilyo ug nideklarar og tulis.
Gikuha sa menor ang bag sa biktima nga aduna’y sulod nga kwarta nga P1,200; Euros 200, USB, mga IDs ug mga importanteng dokumento sa pagpang-apply sa abroad.
Nakasibat ang mga suspek apan nadakpan sila sa gihimong follow-up operation apan wala na ang kwarta ug ubang mga dokumento sa biktima.
Samtang tungod sa sagunson nang nahitabo nga pagpanulis ug pagpanglabni sa lungsod sa Minglanilla gisugdan sa kapulisan matag gabii ang checkpoint sa nagkalain-laing lugar sa maong lungsod.
Si Supt. Dexter Calacar, pangu sa kapulisan sa lungsod sa Minglanilla nibutyag nga daghan nang mga tawo ang nabiktima sa pagpanulis ug snatchings sa nanglabay nga mga adlaw maong gisugdan nila niadtong adlaw nga Lunes ang pagpahigayon og checkpoints. - /EIM) (BANAT NEWS)