Duterte giampo ni Vidal
CEBU, Philippines - Cebu Archbishop Emeritus Ricardo Cardinal Vidal nagsaulog sa iyang ika-61 nga anibersaryo sa iyang pagkapari kagahapon diin usa ka santos nga misa ang iyang gidumala sulod sa iyang panimalay nga gitambongan sa mga higala niining kaparian.
Sa pangidaron niining 86 anyos luya na ang cardinal apan makahimo pa kini sa paghalad og misa sa kapilya sa iyang pinuy-anan sa Brgy. Banilad, Dakbayan sa Sugbo.
"I would like to remind myself that I am a priest and a priest forever according to the order of Melchesedic" tipik sa wali ni Vidal.
Gipadayag niini nga iyang giapil sa pag-ampo ang mga opisyal sa gobiyerno ilabi na si Presidente Rodrigo Duterte kini alang sa kahiusahan sa tanan nga nagserbisyo aron matutukan nila ang tanang panginahanglan sa katawhan ug magpabilin ang kalinaw sa nasud.
"Because how can you govern the people if there is no peace and there is no order in the society?" dugang ni Vidal. Nanghinaut ang cardinal nga magsinabtanay ang mga opisyal nunot sa mga nitumaw karon nga mga nagkadaiyang isyu sa nasud.
Subay sa impeachment nga gipasaka batok kang Duterte, matud ni Vidal nga mas maayong motrabaho na lang ang tanan alang sa kaayohan ug kun dili nila mapugngan, bahala na kini sa ilang mga gihimo.
Suportado sab ni Vidal ang baruganan ni Cebu Archbishop Jose Palma ug sa Catholic Bishop Conference of the Philippines labot sa death penalty.
Wala hinoon mokomento ang cardinal bahin sa pagpa-impeach sa presidente. Rowena D. Capistrano ug May B. Miasco (BANAT NEWS)
- Latest
