El Niño pangandaman na

CEBU, Philippines - Niawhag ang Provincial Disaster Risk Reduction and Management Office ngadto sa mga local government units nga mangandam na sa posibleng pagsinati sa El Niño karong tuiga.

Matud ni Julius Regner, tigpamaba sa PDRRMO, nga posibleng sa Hulyo magsugod ang pagsinati sa huwaw hinungdan nga sila niabiso sa mga LGUs nga magsugod na sa paghimo og assessment sa ilang lugar.

Si Regner nagkanayon nga nagka-estorya na sila sa pangulo sa ilang buhatan, Baltazar Tribunalo Jr., kabahin sa mga angay pangandaman.

Naglakip kini sa ipanghatag nga relief goods ug uban pang kahimanan sama sa mga barrel ug hose sa pagpundo daan og tubig.

Buot sa PDRRMO nga i-revisit sa mga LGUs ang El Niño plan sa niaging tuig hangtud sa tuig 2020 aron sila magiyahan sa mga angay nga himoon. Ang PDRRMO adunay P166 milyones alang karong tuiga nga magamit alang sa mga katalagman.

Si Regner nagkanayon nga angay nga sayo pa lang mangandam na aron kung masinati ang huwaw, gamay lang ang kadaut niini.

Sa niaging tuig ang mga lungsod sa habagatang bahin sa Sugbo ang labing naapektuhan sa huwaw.

Sa laing bahin nasulbad na sa Mines and Geosciences Bureau ang giingong sayop nga geohazard maps nga gihatag sa mga lungsod ug dakbayan.

Sumala pa ni MGB-7 Director Loreto Alburo nga anaa na sa updated nga 1:10,000-scale geohazard map ang kabag-ohan sa geohazard map karon.  Kabahin sa gireklamo mao nga pipila ka barangay ug sapa ang wala naapil sa jurisdiction sa usa sa LGU base sa geohazard maps sa MGB.

Matud ni Alburo nga ang geohazard map gikan kini sa karaan nga mapa sa National Mapping and Resource Information Authority nga ubos sa Department of Environment and Natural Resources.

Atol sa workshop kagahapon sa MGB uban ang mga local disaster officers sa Sugbo, gipasabot ni Alburo kung unsa ka mahinungdanon ang geohazard awareness.

Si Regner nagkanayon nga ang maong seminar makatabang sa pagpangandam sa mga LGUs kung adunay umaabot nga katalagman.  Matud niya nga pinaagi sa geohazard map, mailhan sa mga LGUs kung asa ang mga lugar ang posibleng maapektuhan. (BANAT NEWS)