Konseho modesisyon batok Emit

CEBU, Philippines - Desisyonan na karong semanaha sa konseho sa Dakbayan sa Talisay si Konsehal Doroteo Emit kun kini magpabilin pa ba sa komitiba sa urban poor.

Kini human si Konsehal Gail Restauro nipasalig nga ilang mahuman ang ilang imbistigasyon sud sa duha ngadto sa tulo ka semana gikan sa pagdawat sa mga reklamo. Si Emit gireklamo sa Federation of Talisay City Urban Dwellers Association (FETCUDA) human ilang giakusahan nga nagdala og gubot sa ilang grupo ingon man wala na sila’y salig niini. Nihangyo ang maong grupo nga hukasan sa iyang komitiba sa urban poor si Emit.

Apan si Emit niingon nga ang iyang mga lakang sa pagpadagan sa urban poor aduna’y pagtugot sa iyang mga kaubanan sa konseho pinanguluhan ni  Bise Mayor Alan Bucao. Busa siya masaligon nga dili siya malangkatan sa maong komitiba.

Ang konseho nisangon kang Konsehal Restauro sa paghimo sa imbistigasyon kay siya man ang chairman sa committee on Laws and Ethics sa konseho.

Matud ni Restauro nga nalangay siya sa imbistigasyon kay iya mang gipangutana ang mga tawo nga nipirma sa petisyon nga kun sila nahibawo ba gyud sa ilang gipirmahan.

Samtang si Emit niingon nga wala masayod ang mga tawo sa unod sa ilang gipirmahan diin daghan ang nipirma niini.

Kahinumduman nga si Bise Mayor Bucao una nang nipasidaan kang Emit nga dili magsalig nga anaa ang suporta sa konseho kaniya kay mobarug ang konseho kun unsa gyud ang ilang makita sa dagan sa imbistigasyon.

Asoy niya nga kun makita nga aduna’y basehan ang grupo nga palagputon si Emit, hayan mopakita sa ilang baruganan ang konseho.

Gitambagan na ni Bucao si Emit nga kun iyang makita nga wala na’y salig ang grupo kaniya, dili na lang kini maglangay sa pagbuhi sa maong posisyon. - /DILT) (BANAT NEWS)