Dokumento ni Camomot ipada na sa Roma

CEBU, Philippines - Natapos na ang Diocesan Process sa canonization ni Archbishop Teofilo Camomot niadtong Miyerkules.

Kini ang gitug-an ni Fr. Samsom Selloriquez, postulator sa sainthood ni Camomot, atol sa ika-103 nga adlaw nga natawhan sa Sugbuanong Obispo kagahapon. Ipadala nila karong Martes ang 1,600 ka pahina nga dokumento ngadto sa Roma.

Sumala pa ni Selloriquez nga sa higayon nga maabot na sa Roma ang mga dokumento tun-an kini sa mga sakop sa Congregation of Causes of Saints ug kung makapasar, siyam ka Theologians ang motuon usab sa doctoral thesis sa kinabuhi ni Camomot.

Dugang ni Selloriquez nga kung makapasar sa mga Theologians ang mga dokumento, iduso kini sa College of Cardinals ug kung makapasar ila na sab kining iduso ngadto sa Santo Papa.

Ang Santo Papa na maoy moaprobar ug motawag ni Camomot nga usa ka venerable ug ang Roma lang ang makabutyag kung adunay tinuod nga milagro. Sa pagkakaron ang nahitabo pulos pa lang mga gitubag nga mga pag-ampo.

Si Cebu Archbishop Jose Palma nibutyag nga dako kaayo ang iyang kalipay sa kasaulogan sa adlaw nga natawhan sa usa ka anak sa Carcar.

Sumala pa sa Arsobispo nga si Camomot usa ka salamin sa presensiya sa Ginoo diin kadtong moduol kaniya makadawat og maayong grasya ug pagtulun-an.

Dugang pa sa Arsobispo nga iampo nga tugotan sa Ginoo ug bayawon si Camomot sa sa Himaya sa Ginoo.

Human sa Santos nga Misa gisunod ang pagresponso sa lubnganan ni Camomot ug ang pagbukas sa museum niini ug sa pagka-gabii ang unang Awit Teofilo.

Liboan ka tawo ang nitambong sa Santos nga Misa alang sa birthday ni Camomot. (BANAT NEWS)