Tommy lakip nga misaway sa mga magbabalaod

CEBU, Philippines - Wala makagusto si Mayor Tomas Osmeña nga ang kaso nga rape kon pagpanglugos ug plunder, tangtangon sa listahan sa mga kaso nga ang mga makonbikto mapahamtangan og silot nga kamatayon kun ibalik gyud ang death penalty.

Diha nga ang Republic Act 7659, kon death penalty law, gipatuman pa dinhi sa Pilipinas pipila ka dekada ang nakalabay, ang rape apil sa mga kaso nga mahimong masilotan og kamatayon ang mga akusado nga makonbikto.

Daghan ang nasagmuyo kay ang mga kongresista nga nagtinguha sa pagbalik sa maong silot, dili gusto nga ilakip ang kaso nga Plunder ug Rape sa mapahamtangan og death penalty ang mga akusado.

Apan bisan og wala makagusto si Osmeña sa lakang sa pipila ka magbabalaod, siya mipasabot nga kun mapasar nga dili iapil ang rape sa mga kaso nga masilotan og death penalty, mahimo ra kini unyang himoan og kausaban paglabay sa katuigan.

Gihimong basihanan sa mayor ang daghang mga kaso, apil niini ang anti-drugs law, ug ang local government code, nga makadaghan na nga gihimoan og kausaban paglabay sa pipila ka tuig aron mohaum sa panginahanglan.

Base sa statistics sa Bureau of Jail Management and Penology nagpakita nga daghan sa mga binilanggo ang nakasohan og pagpanglugos, apil na sa mga bata.

Ang katawhan hinoon misaway sa mga magbabalaod nga dili gusto nga ilakip ang Plunder sa masilotan og kamatayon kay nagpasabot ra kini nga wala silay tinguha nga masilotan ang mga kawatan sa kuwarta sa kagamhanan.

Ang mapasakaan og kaso nga Plunder mao kadtong makapangawkaw og P50 milyones o lapas pa, gikan sa kuwarta sa kagamhanan. (BANAT NEWS)