Aljun may awhag sa mga mayor

CEBU, Philippines - Giawhag ni Tuburan Mayor Democrito “Aljun” Diamante Jr. ug presidente sa League of Municipalities in the Philippines – Cebu ang iyang kaubanan nga moduso sa listahan sa mga nalambigit sa ilegal nga drugas ngadto sa Philippine Drug Enforcement Agency.

Atol sa Kapihan sa PIA kagahapon, si Diamante nipahibawo nga andam siya sa pagduso sa listahan nga iyang gihulagway nga pipila na lang human nga ang 33 sa 54 ka barangay ang padayong gi-validate aron madeklarar nga drug-free.

Una na nga nakaduso si Diamante og listahan apan didto sa kapolisan hinungdan nga iyang giawhag ang iyang kaubanan sa LMP nga moduso og laing listahan ngadto sa PDEA nga mao karon ang gitahasan sa operasyon batok ilegal nga drugas.

Matud ni Diamante nga ang tabang sa mga pastors ug nagkadaiyang grupo ngadto sa mga nalambigit sa ilegal nga drugas ang nakapadeklarar sa pipila ka barangay nga drug-free. Samtang si Cordova Mayor Mary Therese Sitoy- Cho atol sa maong kapihan ang nipahibawo sab nga andam siya moduso sa listahan sa nalambigit sa ilegal nga drugas sa iyang lugar.

Sumala pa ni Cho nga dili mominus sa 20 ka tawo ang nalambigit sa drugas sa iyang lungsod ug padayon silang nihimo og mga pamaagi nga maundang na ang ilegal nga kalihukan.

Malaumon si Cho nga niining pagsulbong sa panginabuhian sa ilang lungsod makapahunong kini sa mga nalambigit sa ilegal nga drugas.

Nagtuo sab siya nga mangundang gyud ang mga tawo nga nalambigit sa ilegal nga drugas tungod sa hugot nga kampanya ni Presidente Duterte.  (BANAT NEWS)