CEBU, Philippines - Gilusad kagahapon sa Archdiocese of Cebu ang Cebu Archdiocesan Progress for Drug Dependents nga gitambungan sa kaparian, kapolisan ug mga barangay kapitan sa may San Pedro Calungsod Chapel, Dakbayan sa Sugbo.
Ang CAPDD namugna human nipatawag og tigum si Archbishop Jose Palma sa nilabay nga tuig aron sa pagtabang sa kagamhanan ilabi na sa pagtabang sa mga drug dependents nga nitahan sa ilang kaugalingon.
Matud ni Chief Supt. Noli Taliño, director sa Police Regional Office-7, nga unang higayon ang maong kalihukan kagahapon nga gitambungan sa tanang sekta nga gihangop niya pag-ayo.
Dugang ni Taliño nga sa wala pa mahunong ang ilang Oplan Tukhang aduna nay 105,000 ang nitahan ug 5,000 ang nasikop.
Gitug-an ni Taliño nga tungod kay walay kapabilidad ang gobiyerno sa rehabilitasyon, dunay mga nibalik sa bisyo.
Gipasalig ni Taliño nga “101%” silang mosuporta sa programa.
Ang CAPDD adunay modelo nga programa nga mahimong sundon sa mga parokya ug opisyal nga mao ang Labang ug SuGod Program.
Si Palma sa iyang bahin nitug-an nga ang ilang gihimo dili tungod kay tubag sa panawagan ni Presidente Rodrigo Duterte nga walay nahimo ang simbahan tungod kay wala pa ang pamahayag sa presidente aduna na silay gihimo.
Malaumon ang Arsobispo nga masugdan dayon ang programa ug ila kining nuntan pinaagi sa pagpaduso sa mga report sa kaparian kung unsay ilang nahimo sa maong proyekto. (BANAT NEWS)