Field trip angay istriktuhon – Bucao
CEBU, Philippines - Gitug-an ni City of Talisay Vice Mayor Alan Bucao nga dili siya pabor nga wagtangon ang field trip nga apil sa mga kalihukan sa mga tunghaan.
Gibase ni Bucao ang iyang pagsupak human niya nasinati ang kanindot sa maong programa sa dihang siya tinun-an pa.
Matud niini nga ang kinahanglan lang gyud sa maong programa mao ang pag-estrikto sa tanang aspeto gikan sa adtuan nga lugar ug sa sakyanan sa mga tinun-an.
Nunot niini, iyang pakigkitaan si Schools Division Supt. sa DepEd Talisay City Division Leah Noveras.
Asoy pa niya nga ang seguridad gyud ang labing una nga ilang tukion aron malikay ang mga bata sa disgrasya.
Nasayran nga 13 ka tinun-an, usa ka drayber ang namatay samtang 20 ang samdan sa nahitabong disgrasya didto sa kaulohan niadtong miaging adlaw dihang nawagtangan og brake ang tourist bus nga ilang gisakyan hinungdan nga nadasmag kini samtang nagpaingon sa camping site. (BANAT NEWS)
- Latest
