CEBU, Philippines - Gidid-an na nga makasulod sa Cebu City Jail Male Dorm ang duha ka tawo human nakuhaan og mga kontrabando nga ipalusot unta sa prisohan.
Ang gipaubos sa imbestigasyon apan gibuhian ra mao sila si Ronald Patricio ug Rosemarie Inoc, pulos taga Ermita, Dakbayan sa Sugbo.
Matud ni Jail Supt. Jessie Calumpang, warden sa CCJ, nga padulong mobisita kang Orlando Patricio kinsa dunay kaso nga robbery ang duha dihang nakit-an ang mga kontrabando sa dala niining bag.
Kini naglakip sa 188 ka disposable lighters, duha ka cellphones, 1,000 kabuok nga medium-size transparent plastic, charger, small sound box ug duha ka USB cord.
Dugang ni Calumpang nga suway pa unta nga nidagan si Inoc apan dali kining nasikop.
Atol sa imbestigasyon ang duha niangkon nga P2,000 ang ilang madawat kung ila pa napalusot ang mga butang.
Gitug-an ni Calumpang nga gibuhian lang nila ang duha tungod kay wala silay mapasaka nga kaso.
Malaumon si Calumpang nga maaprobahan ang iyang gihangyo nga ordinansa nga mapasakaan og kaso kadtong mga tawo nga magdala og kontrabando sulod sa CCJ.
Samtang sa Talisay City Jail, nasikop ang usa ka babaye human nisuway sa pagpalusot sa ginadiling drugas sa iyang pagbisita sa iyang bana niadtong Domingo sa hapon.
Ang nasikop mao si April Tecson Marikit, 36, taga Barangay Lawaan III.
Si Marikit kuyog sa iyang upat ka anak nga pulos minor de edad aron bisitahon ang iyang bana nga nabilanggo niadtong Enero 11 gumikan sa kaso sa drugas. Apan sa dihang girekisa si Marikit ni JO1 Geraldine Calum, iyang nabantayan nga nagbagal ang duha ka bitiis niini ug didto nakita ang pinutos nga gituohang drugas ug P78 mil nga gipapilit sa iyang bitiis.
Matud ni Chief Insp. Josephus Jelianggao, warden sa TCJ, nga 50 gramos ang gibana-bana nga timbang sa ginadiling drugas samtang posible nga i-remit ang maong kwarta sulod sa prisohan.
Sa laing bahin, nasikop ang 18-anyos nga lalaki human nakuhaan og drugas sa Lower Mahayahay, Candulawan, Dakbayan sa Talisay niadtong Domingo sa buntag.
Ang dinakpan mao si Michael Bacatio, ulitawo nga nagpuyo sa nahisgutang lugar.
Si Kapitan Josefina Concial uban sa iyang anak nga si Tanjih ang nakatayming sa batan-on nga aduna’y ilegal nga drugas nga gidala hinungdan nga ila kining gisikop.
Nakuhaan siya og drugas nga mobalor og P4,720.
Si Concial ang ni-turnover sa suspek ngadto sa buhatan sa kapolisan ug gikatakda siyang pasakaan og kaso. Rowena D. Capistrano ug Gabriel C. Bonjoc (BANAT NEWS)