Kan-anan adunay kalapasan — City health

CEBU, Philippines - Gimanduan ni Mayor Tomas Osmeña ang Neo Neo Grill House nga moesplikar sa alegasyon nga ilang giatubang human adunay mireklamong kustomer nga adunay gagmay’ng ok-ok nga naglutaw-lutaw sa sabaw nga ilang gi-serve.

Kagahapong adlawa, giluwatan ang maong order ug nadawat na sa management sa maong kan-anan pagkagahapon.

Gihatagan ni Osmeña ang maong kan-anan og lima ka adlaw human ilang nadawat ang maong show cause order.

Sa ilang bahin, ang nagdumala sa maong kan-anan nagdumili paghatag og reaksyon kay nagkasabot na sila sa mireklamo nga sulbaron ang maong problema.

Kahinumduman nga nag-post sa iyang Facebook account si Francis Tallo kinsa mikaon sa maong restaurant sa miaging semana uban sa iyang igsuon ug inahan.

Matud ni Tallo nga ang iyang igsuon maoy nakabantay sa gagmay’ng ok-ok nga anaa sa sabaw nga nakaon na nila.

Tungod niini, ang City Health Department magpadala og mga tawo ngadto sa restaurant karong adlawa aron mag-inspeksyon. Mao kini ang ikaduhang inspection nga gibuhat sa buhatan sa maong kan-anan.

Matud ni Dr. Alma Corpin, pangulo sa CHD nga adunay kalapasan nga nakita sa unang inspeksyon ug tan-awon kini karong adlawa kun adunay adjustments nga gihimo ang kompanya alang sa maong kalapasan.

Ang maong kalapasan nga nakita matud ni Corpin mao ang health card sa establishment ug ang sanitary permit niini. (BANAT NEWS)