Jail officer napalgan patay

CEBU, Philippines - Patay na nga napalgan sulod sa boarding house ang usa ka jail officer sa Cebu City Jail sa Maya St., Brgy. Kalunasan, Siyudad sa Sugbo pasado alas 10 sa buntag kagahapon.

Ang namatay giila nga si JO1 James Sales, 32, ulitawo, kawani sa Bureau of Jail Management and Penology ug lumad nga taga Linabo, Siyudad sa Dapitan, Zamboanga del Norte.

Gibutyag ni JO2 Misael Silva nga iyang giadto sa boarding house si Sales tungod kay wala kini mo-duty.

Gituktok ni Silva ang pultahan apan wala kini motubag maong gilili kini niya sa bintana ug nakit-an nga nagkulob na si Sales ug dali kining gitabang apan wala nay kinabuhi si Sales.

Wala’y butang nga nawagtang ug wala’y nakita nga kadaut sa lawas ni Sales nga makapaduda sa foul play.

Gipaubos sa autopsy ang patay’ng lawas ni Sales aron mahibaw-an ang hinungdan sa iyang kamatayon. Jomari Fernandez (BANAT NEWS)