CEBU, Philippines - Bisan niluwat na sa katungdanan ang mayor sa Aloguinsan nga si Augustus Caesar Moreno, gitataw sa Department of Interior and Local Government nga ila gihapon i-serve ang dismissal order sa Ombudsman.
Si DILG provincial director Jerome Gonzales nagkanayon nga bisan gani kung wala na sa katungdanan ang usa ka opisyal tungod kay napilde sa eleksiyon, ila gihapon i-serve kung may kamanduan.
Hinoon sumala pa ni Gonzales nga aduna pay legal remedies ang usa ka opisyal sa iyang kaso apan kung magpadayon ang kaso ug dili mabakwi ang dismissal dili na kadagan pa ang maong opisyal ilabi na kung adunay perpetual disqualification.
Nunot sa pagluwat ni Moreno sa katungdanan, usa ka pwesto sa konseho ang mabakante sanglit ang numero unong konsehal mosaka man sa pagka-bise mayor ug ang bise mayor na ang molingkod isip mayor.
Matud ni Gonzales nga anaa ra sa konseho kung ipabilin ba nila nga bakante ang pwesto sanglit korum man gihapon sila.
Apan kung papulihan, ang partido sa nabakante nga opisyal maoy mopili og ihulip ug irekomendar ngadto sa gobernador nga maoy adunay appointing authority. Dugang ni Gonzales nga mao sab kini ang mahitabo sa Lungsod sa Dumanjug diin ang mayor nga si Efren Guntrano Gica gipatangtang sab sa Ombudsman. (BANAT NEWS)