CEBU, Philippines - Gipaniguro ni Naga City Mayor Kristine Vannessa Chiong nga mahatagan og pagtagad ang mga adlaw nga wala makatungha ang mga tinun-an tungod sa mga kalihukan sa Central Visayas Regional Athletic Association (CVRAA).
Ang siyudad sa Naga mao na sab ang host sa CVRAA karong tuiga diin sa maong dakbayan na gyud ipahigayon ang tanang sports events sukwahi sa niaging tuig kay nahuman na ang ilang standard size swimming pool.
Asoy ni Mayor Chiong nga kagahapon nagsugod na sa pagpangabot ang mga delegado ug gi-andam na ang mga tunghaan nga ilang kapuy-an.
Kini niingon nga adunay mga program ang DepEd nga mohimo og make-up classes o dugang oras sa ilang klase alang sa mga tinun-an nga naapektahan sa kalihukan.
Adunay 17 ka participating schools alang sa CVRAA nga sugdan karong Domingo, Pebrero 12 ug tapuson sa Pebrero 17.
Dugang sa mayor nga han-ay na ang tanan alang sa maong kalihukan human sa ilang subsub nga pagplano uban sa kapolisan.
Iyang gihatagan og kamanduan ang mga opisyal sa barangay nga ilang maatiman ang mga delegado, pagmentinar sa kalimpyo sa ilang mga lugar ug pagtubag sa dagan sa trapiko.
Gipahibawo ni Naga City Police Station chief PSupt. Gregorio Galsim nga samtang sila naghuwat sa mga delegado, nagpaabot sab sila sa augmentation force gikan sa Cebu Provincial Police Office ug sa armadong kusog .
Nagpadayon sab ang ilang seminar sa mga Barangay Peace Action Team (BPAT) nga maoy muabag sa kapolisan ug sundalo nga magbantay sa matag kwarter sa mga delegado. Iyang gibana-bana nga muabot sa 7 mil ka delegado ang motambong sa maong kalihukan. (BANAT NEWS)