CEBU, Philippines - Giklaro ni Talisay City Mayor Eduardo Gullas nga dili siya mobabag sa resolusyon sa konseho sa pagpahulip sa representante sa Presidential Commission for the Urban Poor (PCUP) nga si Ma. Llura Layun.
Kahinumduman nga ang konseho sa maong dakbayan nipasar og resolusyon sa pagpahulip kang Layun gumikan sa giingong anomaliya nga nabuhat niini. Gihimakak na ni Layun ang maong pasangil ug matud pa nga ang gipasar nga resolusyon pagtaktak kaniya usa ka pamulitika. Gani gilabanan man siya sa kahugpungan sa mga urban poor kay gitumo-tumoan lang siya og istorya.
Si Layun nakigkita ni Mayor Gullas niadtong miaging semana sa buhatan niini aron isaysay ang iyang habig. Apan si Gullas niklaro nga wala siya'y plano nga babagan ang kagustuhan sa konseho.
Nasayran, ang konseho nipalabang na sab og resolusyon nga ilang imbistigaron si Layun. Ang maong resolusyon gisaway sa Federation of Talisay City Urban Dwellers Association (FETCUDA) kay nag-una ang pagpalagpot kaysa imbistigasyon.
Asoy ni Gullas, dili niya supakon ang konseho tungod lang sa usa ka tawo. Gani gusto sab siya nga mobasa sa resolusyon sa dili pa siya mohatag og komentaryo.
Si Layun mao gihapon ang PCUP sa Talisay samtang nagpaabot sa desisyon sa ilang rehiyonal nga buhatan.
Nilingkod sa maong katungdanan si Layun sukad pa niadtong tuig 1995. (BANAT NEWS)