CEBU, Philippines - Mosusi ang General Services Office (GSO) kung gigamit ba sa personal ang sakyanan sa Barangay Pung-ol Sibugay nga nag-trending sa Facebook ang hulagway nga gigamit sa usa ka kasal.
Nagkanayon ang pangulo sa GSO, Ronald Malacora, nga ang maong sakyanan giisyu kang Barangay Konsehal Medardo Coco Jr., kinsa kaalyado sa Bando Osmeña-Pundok Kauswagan (BOPK). Tungod kay nag-trending sa Facebook ang hulagway sa Hi-Lux nga sakyanan sa Barangay Pung-ol Sibugay nga dunay plate number SKV 369 nga sama sa gigamit sa kasal, si Malacora niingon nga kuhaon nila ang habig sa konsehal ug pangayuon sab sa GSO ang trip ticket aron masuta kung duna bay request gikan sa ilang konstituwente sa barangay.
Gipasabot ni Malacora nga dinhi magsugod ang ilang imbestigasyon aron masuta kung duna bay tulubagon ang konsehal o wala.
Giklaro sa GSO nga nakabutang sa trip ticket nga ang sakyanan mahimong gamiton sa official trip, garbage collection, request sa mga molupyo sa barangay nga magpadala sa tambalanan ilabi na sa bukiran ug mga transaksiyon sa City Hall ug ubang ahensiya sa gobyerno.
Subay niini, si Cebu City Mayor Tomas Osmeña niingon nga daghan ang ingon niini nga insidente apan iyang gihimug-atan nga mas daghan pang dagko nga problema nga angay tutukan sama sa drugas, basura ug trapik.
Hinoon kini niingon nga iya kining susihon ug aksiyonan.
Samtang ang GSO niklaro nga walay problema kung gamiton ang sakyanan ilabi na sa mga bukirang barangay tungod kay ang serbisyo sa gobiyerno walay gipili nga oras ug panahon apan seguraduhon lang nga dili kalimtan ang trip ticket ug isukip ang request aron dili mapasanginlan nga gigamit sa personal. (BANAT NEWS)