Crisis center sa probinsiya di pa magamit
Niadtong Disyembre gi-inugurahan ang first phase sa crisis center nga puy-anan sa kababayen-an ug kabataan sa probinsiya kinsa mga biktima sa pagpangabuso. Ang mga serbisyo nga ihatag sa maong center ngadto sa mga biktima langkuban sa psychological, livelihood training, medical ug legal.
Si Hedda Largo, gender and development officer sa Provincial Women’s Commission (PWC), nagkanayon nga gipaningkamutan nilang ma-operational sa unang quarter niining tuiga ang nahisgutang center.
Matud ni Largo nga karon padayon pa silang nang-hire og mga personnel nga modumala sa center ug kinahanglan nga mosubay sila sa mga rekisitos sa Department of Social Welfare and Development (DSWD).
Gibutyag ni Largo nga nangita sila karon og psychologist, social workers, house parents ug security.
Si Largo nagkanayon nga kung ma-operational na ang nahisgutang center dako kaayo kini og tabang ngadto kanila. Gipasabot ni Largo nga sa karon kung duna sila’y ma-rescue nga mga minor nga biktima sa pagpangabuso ilabi na babaye ug lalake magproblema sila kung asa nila kini ibutang o papuy-on tungod kay dili pwedeng itipon ang babaye ug lalake.
Ang kasagarang mga center babaye ang dawaton ug ang lalake maproblema sila asa nila kini ibutang. Dugang ni Largo nga sukad sa niaging tuig hangtud niining buwana kapin sa 20 ka minors ang ilang gisuportahan ug gipangbutang nila kini og mga center nga moatiman kanila.
Ang PWC nihatag usab og suporta ngadto sa mga centers nga nahimutangan sa mga biktima. (BANAT NEWS)
- Latest
