Talisay magbutang og early warning system
CEBU, Philippines - Mobutang ang kagamhanan sa Dakbayan sa Talisay og Early Warning System (EWS) karong ikaduhang kwarter niining tuiga aron makabantay ang katawhan kung may moabot nga katalagman.
Si Alvin Santillana, pangulo sa City Disaster Risk Reduction and Management Office, nibutyag nga mokantidad ang maong proyekto og P4 milyones.
Matud niya nga ang EWS usa kini ka kahimanan nga mo-detect sa paspas nga pagsaka sa tubig sa sapa ug mo-serin sab kun delikado na ang kahimtang sa mga molupyo.
Sigun pa niya nga ang pag-alarma sa kahimanan maoy butang nga mopahibawo sa katawhan nga angay na silang mohiklin sa ilang nahimutangan ug moadto na sa mas luwas nga lugar.
Asoy pa ni Santillana nga ila bansayon ang katawhan nga namuyo sa kasapaan sa maong kahimanan ug kun asa sila moadto kun kini motingug na.
Una nilang butangan ang Barangay Jaclupan, Lagtang, Tabunok, Lawaan 3, San Isidro, Lawaan 2, Biasong ug Dumlog nga maoy agianan sa Mananga River.
Dugang ni Santillana nga dako kini og ikatabang sa tanan ug aron paspas ang ilang lihok matag tingug sa EWS.
Nagkanayon si Santillana nga mosunod unya nilang gahinan og budget ang Barangay Bulacao nga aduna sa'y sapa nga bahin. (BANAT NEWS)
- Latest
