Mayor Moreno di pa manaug sa pwesto

CEBU, Philippines - Wala pa nanaug sa pwesto si Aloguinsan Mayor Augustus Caesar Moreno bisan sa kamanduan sa Ombudsman sa pagtaktak kaniya sa serbisyo may labot sa kasong grave misconduct.  Si Moreno nagpaabot pa nga ma-serve sa Department of Interior and Local Government ang order gikan sa Ombudsman.

Apil sa gi-dismiss ang iyang asawa nga si kanhi bise mayor Cynthia Moreno ug laing lima ka opisyal sa lungsod may labot sa kahiwian sa pagpalit og food supplies nga moabot sa P287, 725 niadtong 2010.

Matud sa mayor nga andam siya manaug sa pwesto kung naa na ang order apan una na niyang gipahibawo nga mosang-at sila og motion for reconsideration sa buhatan sa Ombudsman.

Si DILG provincial director Jerome Gonzales nagkanayon nga wala pay niabot sa iyang buhatan nga mando gikan sa Ombudsman.

Matud niya nga moagi pa kini sa DILG Secretary paingon sa regional director ug sa iyang buhatan kung siya ang sugoon sa pag-serve sa dismissal order.

Kung manaug na ang mayor, ang iyang anak nga si Bise Mayor Cesar Ignatius Moreno ang mohulip isip mayor.

“Ang sa pagkakaron ang akong nahibaw-an ana dili pa na siya final and executory, nya daghan pa kaayo process, pero kun akoy pabut-on ganahan na unta ko nga mo-assume, pwede na gani ko unta,” matud ni Ignatius. (BANAT NEWS)