CEBU, Philippines - Gisakmit sa mga sakop sa Department of Veterinary Medicine and Fisheries ang 35 ka kilos nga tiil sa manok nga giingong dunay infection sa Carbon Public Market kagahapon sa kadlawon.
Matud pa ni Dr. Alice Utlang, pangulo sa DVMF sa Dakbayan sa Sugbo, nga gisakmit sa iyang mga sakop ang mga tiil sa manok tungod kay aduna kini “bumble foot disease” kon infection ug dili kini maayo kan-on sa tawo kay adunay nana ang kubal niini.
Sumala pa ni Utlang nga dako og posibilidad nga ang kahugaw sa sawog sa tangkal sa mga manok ang hinungdan nga nakuha niini ang kagaw ug dili mahimong kaonon sa tawo apan pwede sa mananap.
Pahimangno ni Utlang nga segurohon nga limpyo ang gipamalit aron limpyo sab kining kan-on ug makalingkawas sa posibleng sakit nga motumaw. (BANAT NEWS)