CEBU, Philippines - Mireklamo ang ubang lokal nga kagamhanan sa Sugbo sa gipangapud-apud nga geohazard maps sa buhatan sa Mines and Geosciences Bureau gumikan kay ang ubang barangays ug kasapaan wala sa mapa.
Sumala ni Julius Regner ang tigpamaba sa Provincial Disaster Risk Reduction and Management Office nga ilang nasuta atol sa ilang pakighinabi sa mga opisyal ug pangu sa local disaster offices sa milabay’ng tuig nga ang usa ka barangay sa lungsod sa Argao ug usa ka suba sa Moalboal wala naapil sa mapa. Si Regner nagkanayon nga dili lang kining duha ka lungsod ang apektado apan ang uban pud nga kalungsuran sa habagatang bahin sa Sugbo.
Matud usab ni Rhee Telen II sa PDRRMO nga ang mga opisyal sa lungsod ug local disaster office naglibog niining mapa kay dili tukma.
“Duna’y discrepancies sa map. For instance, naa’y river or creek in between sa duha ka barangays pero wala sa map. In defense of MGB, its data is way back 2014 pa,” sumala ni Telen.
Ang 1:10,000-scale geohazard map nakompleto sa tuig 2014. Matud ni Telen nga 21 ka LGUs sa southern Cebu ang nakadawat niini ug ang Cebu City. Matud ni Regner nga ang pagpahigayon og dili aktuwal nga mapping ug assessment maoy hinungdan nga sayop ang mapa.
Sumula ni Regner nga ang buhatan sa MGB mopahigayon og validation ug update sa maong mapa.
Gihulagway ni Regner nga importante kaayo ang geohazard mapping tungod kay makita sa mapa kung asang dapita ang delikado sa baha, landslide ug uban pang mga delikado nga lugar nga angay likayan. Ang geohazard map usa ka mahinungdanong gamit sa disaster risk reduction and management dugang pa ni Regner.
Apan si Marian Codilla, information officer sa Mines and Geosciences Bureau-7, mipasabot nga ang maong ahensya nakumpleto na ang paghimo sa geological hazard mapping sa tibuok Pilipinas.
Matod niya nga giapil niini ang mga specifics hangtod ngadto sa matag sitio.
Apil sa maong geohazard workshops mao ang mga kapitan ug konsehal sa barangay, mga local disaster risk reduction units, mga magtutudlo, mga barangay tanod, ug ubang mga pangulo sa mga people’s organization.
Ang mga kopya usab sa mga geohazard maps, apil ang map coordinates sa specific geologically hazardous areas giapud-apud na pud, matod ni Codilla.
Si MGB-7 regional director Loreto Alburo miawhag sa mga lokal nga opisyal nga aron malikayan ang mga geohazard effects, mopatuman kini og epektibo nga palisiya ug regulasyon nga angay sa maong lugar. Matud niya nga ang maong ahensya makahimong morekomendar lamang ug dili kini mandato sa pagpahunong sa mga konstruksyon sa mga pribado nga development projects.
Ang MGB-7 miingon nga adunay 789 ka barangay sa Central Visayas nga “highly susceptible” sa landslide ug pagbaha. Adunay 37 nga ka munisipalidad ug syudad sa probinsya sa Sugbo nga giila og “critical areas” sa MGB-7 apil ang Cebu City ug Mandaue City. Sa syudad sa Sugbo, adunay 41 ka barangay nga “susceptible” sa pagbaha ug 63 ka barangay nga “vulnerable” sa landslide. Kristine B. Quintas ug May B. Miasco (BANAT NEWS)