CEBU, Philippines - Duha na unya ka contingents ang masaksihan sa katawhan sa Dakbayan sa Talisay sa sunod tuig nga pagpahigayon sa Sinulog. Kini human si Mayor Eduardo Gullas bukas sa plano nga isakbang usab ang secondary nga mga tinun-an sa dakong kalihukan. Apan giklaro sa mayor nga iya lang usab kining ikonsulta sa mga hingtungdan buhatan kun idayun ba ang maong plano.
Sa lahi nga interbyu, si Bise Mayor Alan Bucao ang nakapangutana sa nigawas nga resulta sa Sinulog karong tuiga kun diin ang Talisay nahimutang lang sa ikaupat nga mananaog.
Apan siya nakaingon nga basin og lahi na ang criteria sa Sinulog Grand Parade. Gani siya niangkon nga lupigon gyud sa linihukay ang mga elementarya kay sa sekondarya nga dagko na.
Niadtong miaging adlaw, si Josephine Rabaya, principal sa Talisay City Central School ug ang iyang mga kaubanang magtutudlo nibisita sa buhatan sa mayor aron personal nga ipaabot ang ilang pagpasalamat niini sa suporta nga gihatag diha kanila. Ang Dakbayan sa Talisay nigasto og P6 Milyones alang sa ilang contingent ug karon mopagawas sila og P.5 Milyon aron ipahalipay sa mga kabataan ug sa mga magtutudlo human sila midaug sa Sinulog sa Kabataan ug nabutang sa ikaupat nga mananaog sa Sinulog Grand Parade. Gabriel Bonjoc (BANAT NEWS)