CEBU, Philippines - Patay ang usa ka lolo human matabunan sa nidahili nga yuta ug mga bato samtang kini nanglimpyo sa iyang tugkaran pasado alas-10 kagahapon sa buntag diha sa Sitio Lukana, sa Brgy. Kalunasan ning Dakbayan sa Sugbo.
Wa nay pinitik sa pulso ug wa na maginhawa si Calixto Taburnal Sr., 78, dihang naugkat sa mga sakop sa Emergency Medical Services sa dakbayan.
Matud pa sa operations chief sa Cebu City Disaster Risk Reduction Management Council nga si Harold Alcontin nga dihang miabot sila sa lugar wa nay kinabuhi si Taburnal base sa assessment sa EMS.
Dugang pa niya nga nakadawat ang CCDRRMC og tawag sa ilang UHF radio frequency og pakitabang gikan sa tanod sa Kalunasan hinungdan nga miresponde dayon sila sa dapit.
“Nanawag ang barangay tanod sa Kalunasan, di man gud kaayo nato mabasa ang tingog kay scratchy kaayo. Ang atong masabtan ra nga naay napiit,” butyag ni Alcontin.
Sa pag-abot nila sa lugar nga nahitaboan ila pang nakit-an nga natabonan pa sa yuta ug bato ang maong lawas ni Taburnal maong dali nila kining gikuykoy apan naabtan sila og 30 minutos.
Wala na madala sa tambalanan ang tiguwang nga nakabsan na sa iyang kinabuhi tungod sa iyang nahiagoman nga kadaot sa iyang ulo.
Ang labaw sa CCDRRMC ug Public Information Office nga si Nagiel Bañacia, miingon nga mimando si Mayor Tomas Osmeña sa paghatag og P10 mil nga hinabang sa pamilya sa namatay.
Gawas sa Kalunasan lain pang landslide ang nahitabo sa Brgy. Malubog kagahapon apan walay gikataho nga naangol o nakalas niini.
Nanawagan si Bañacia sa katawhan nga magpadayon nga magmabinantayon sa ilang palibot ilabi na nga padayon ang pag-ulan karon.- Jovie Zyra Toling (BANAT NEWS)